Kalaallit efterskoleriartartut sammineqarput

Kalaallit Nunaata Radioa Danmarkillu Radioa suleqatigiillutik inuusuttunut ullumi toqqaannartumik radiukkut aallakaatitsipput.

KNR-imi suleqaterput Paninnguaq Abelsen, Danmarkimilu ukiorpassuarni radiukkut aallakaatitsisarsimasoq Tine Bryld, pulaartulerlutik kalaallit inuusuttaasa Danmarkimut efterskoleriaraluarlutik angerlaannartartut sammivaat. Paninnguaq Abelsenilu aallakaatitsinissamut pissangasimaqisoq naapipparput:

- Taamatut aallakaatitsinissamik soqutiginninnersunga aperineqarama pissangasimasupilussuuvunga, Paninnguaq Abelsen oqarpoq, nangillunilu:

- Aallaqqaammulli soqutigisorujussuuara, qanilliartortillugulu piareersarnerit ingerlatillugit nuannersimasorujussuuvoq. Unnuaq sinnarlussimasorujussuuvunga assut sinnattupilullunga, pissanganermik, Paninnguaq Abelsen oqarpoq.

Taamatut aallakaatitsisoqarnissaa pilersaarutaasimanngikkaluarpoq. Nalaatsornerinnakkulli eqqarsaat pinngorsimavoq, Tine Bryld oqarpoq:

- Aasaanerani feriareerlunga ullumi aallartittussaagaluarpunga. Kalaallit Nunaannili Eqqartuussiveqarneq pillugu Ataatsimiititaliarsuup Nuummi ataatsimiinnera iluatsillugu aallakaatitsineq piviusunngorpoq, inunnik isumaginninnermut siunnersorti Tine Bryld oqarpoq.

Taassuma aamma neriuutigaa, taamatut aallakaatitsisoqaqqissinnaajumaartoq. Soorlu Tine Bryld oqartoq:

- Kalaallit Nunaat kalaallillu pillugit isummat pigiliutinnakkat allanngortinnissaannik radiukkut aallakaatitsisarnerit iluaqutaasinnaapput, Tine Bryld oqarpoq.