Kalaallit Deep Purple tusarnaarusuppaat
Nipilersoqatigiit tusaamasat Deep Purple, Kalaallit Nunaannut tusarnaartitsiartornissaat anguniarlugu facebookimi qupperniliortoqarpoq.
Allattoq Louise M. Kleemann
juulip 06-at 2010 13:16
Heavy Rock-ertartut Deep Purple nipilersortartuupput Tuluit Nunaanneersut 1968-imilu pilersitaallutik. Nipilersoqatigiit atugaat nuannarineqarnerpaaq tassaavoq ‘Smoke on the water’.
- Naalungiarsunniit utoqqarsuarnut ‘Smoke on the water’ atorneqalerpat ingiorsinnaagaat qularinngilarput, nunatsinnukartitsiniat aallarniisuisa ilaat Hans Peter Kleemann oqarpoq.
Nunatsinnukartitsiniat Facebookimi maajimili gruppeliorput maannalu 1.028-nik nunatsinnit tamaneersunik ilaasortaqarluni.
- Heavy Rockertarnermik nassaartut nunarsuarmi tamani nipilersortareersut Kalaallit Nunaat alianaatsoq maanna ornittariaqarpaat, gruppemi allattoqarpoq.
