Assi: Hordaland fylkeskommune/Flickr

Venstre: Kalaallit danskit oqaasiinik akeqanngitsumik ilinniarnissaminnut suli periarfissaqarput

Kalaallit savalimmiormiullu Danmarkimiittut oqaatsinik pikkorissarfiit saniatigut danskit oqaasiinik ilinniarnissamut neqeroorutinik akeqanngitsunik allanik pissarsisinnaanerat qulakkeerneqareersoq, Venstrep erseqqissaatigaa. Danskilli oqaasiinik pikkorissarfinni pikkorissartut siunissami nammineerlutik akiliisalernissaat partiip siunnersuutigaa.

Innuttaasut kalaallit savalimmiormiullu Danmarkimiittut akileeqqaanngikkaluarlutik danskit oqaasiinik siunissami aamma ilinniarsinnaapput.

Danskit oqaasiinik ilinniartitaanernut allamiunut danskisullu innuttaassusilinnut 18-it sinnerlugit ukiulinnoortunut nammineq akiliuteqartitsisarnermik eqqussinissamik danskit naalakkersuisui siunnersuuteqareersut Venstre taama neriorsuuteqarpoq.

AAMMA ATUARUK Danskisut ilinniarsinnaanermut akiliisalertoqassappat kalaallinut eqquinerlussinnaavoq

Danskisut innuttaassusillit danskit oqaasiinik ilinniartitaanerit oqaatsinik pikkorissarfinni ingerlanneqarnerusartut atunngikkaluarlugit danskit oqaasiinik neqeroorutit allat atorlugit akeqanngitsumik ilinniarsinnaapput.
 
Tamatumanilu Inersimasunut Piareersaataasumik Ilinniartitsineq (FVU) aamma aallartisarnissamut neqeroorutit, Danmarkimi suliffissaaleqinermi atorneqartartut kommunillu akilertagaat pineqarput.

AAMMA ATUARUK Danskit oqaasiinik ilinninernermut akiliisarnissaq akerlerineqaqisoq

- Allanik periarfissarpassuaqarpoq akeqanngitsunik, taamatullu aamma inersimasunut piareersaataasumik ilinniartitsineq imaluunniit kommunikkoortumik aallartisarnermut neqeroorutit aqqutigalugit danskit oqaasiinik ilinniarnissamut periarfissat assigiinngitsorpassuupput. Tamakkulu danskit, nunani allani najugaqarsimasut, imaluunniit kalaallit savalimmiormiullu atorsinnaavaat, akeqanngillat, Venstrep Kalaallit Nunaannut tunngasunut oqaaseqartartua, Marcus Knuth, taama oqarpoq.

EU-mi malittarisassat sianiginiarneqartariaqartut

Danskit oqaasiinik ilinniartitaanernut nammineerluni akiliuteqartitsinissamik siunnersuutip kalaallit savalimmiormiunullu atuutsinneqarnera EU-mi inatsisiliornermut tunngassuteqarpoq.
 
EU-mi malittarisassat naapertorlugit Danmarkip innuttaasuni danskit oqaasiinik ilinniartitaanernut tunngatillugu innuttaasunut EU-mi nunanit allaneersunut naleqqiullugit allaanerusumik atugassaqartissinnaanngilai.

AAMMA ATUARUK Danskisut ilinniarnissamut akiliuteqartitsiniarneq unitsilli

- Danskilli naalakkersuisui pikkorissaanernut akeqanngitsunut allanut periarfissaqartitsipput, Marcus Knuth KNR-imut taama oqarpoq.
 
- Tamannalu kalaallinut savalimmiormiunullu danskit oqaasiinik ilinniarnissamik pisariaqartitsisunut ikitsuararsuarnut periarfissaavoq pitsaalluinnartoq.

Siunnersuut folketingimut ilaasortanit nunatsinneersunit isornartorsiorneqarpoq, isumaqarlutik kalaallit savalimmiormiullu Danmarkimi allamiunut taamaaliornikkut nallersuunneqalersut. Taamaammat Inuit Ataqatigiit allannguutissatut siunnersuummik Folketingimi saqqummiussiniarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat