Kalaallit danskillu uulia pillugu suleqatigiittariaqarput

Uuliaqassappat siunissami iluanaarutissat pillugit Kalaallit Nunaat Danmarkilu piaartumik isumaqatigiissuteqartariaqarput.

Uuliaqassappat qanoq pisoqarnissaa pillugu massakkut oqillinnerit siunissami isumaqatigiinniarnissani tutsuiginanngissusermik tatiginninnginnermillu illuatungeriit akornanni pilersitsiartuinnarput, taama isumaqarpoq Roskildep ilisimatusarfiani ilisimatooq nunarpullu pillugu immikkut ilisimasalik, Rasmus Ole Rasmussen.

- Uuliasioqatigiiffinnut isumaqatigiinniarnissat eqqarsaatigalugit, kalaallit qallunaallu ersarissumik inissillutik suleqatigiinnissaat, taamasillutillu ataatsimoorussamik oqariartuuteqarsinnaanissaat isumaqatigiinniarnissani pingaaruteqarluinnarpoq, Rasmus Ole Rasmussen erseqqissaavoq.

- Massakkut oqillinnerit assortuunnerillu pissutigalugit siunissami isumaqatigiinniarnissani sanngiitsumik kalaallit qallunaallu inissisinnaapput. Tassa naalaggaaffeqatigiinnermi maleruagaassat illuatungaanilu Namminersornerullutik Oqartussat soqutigisaat angorusutaallu akerleriippata, tamanna uulisiorfissuit aalajangerniarnerannut ajoqutaaginnarsinnaavoq, Rasmus Ole Rasmussen oqarpoq.

Apeqqutit assigiinngitsut inissivissimatinnagit suleqatigiinnissaq pingaaruteqarpoq. Soorlu Avatangiisinik aqutsinermi kikkut oqartussaassappat? Kalaallit kisimik imaluunniit kalaallit danskit avatangiisinut aqutsisoqarfiat suleqatigalugu?

Canadami uuliasiortoqalermat periusaasimasunik Rasmus Ole Rasmussen, misissuisimavoq.

- Canadap kangiani uuliasiortoqalermat uuliasiorfissuit tunngaviusumik isumaqatigiissuteqarfigineqarsimapput, kalaallit danskillu aamma taamaaliorsinnaapput, isumaqatigiinniarnissanilu tatiginarnerusumik taamaalillutik inissillutik, Rasmus Ole Rasmussen oqarpoq.