Kalaallit danskillu kommunii isumaginninnermi navianartorsiortut pillugit suleqatigiittariaqarput

Kalaallit meeqqat 1000-it missaanniittut maannakkut isumaginninnikkut navianartorsiortuusut, immikkut ilisimasallit missiliorpaat. Taakkualu kingusippallaamik ikiorneqartarput.

Ajornartorsiutip aaqqiiffigineqarnissaanut Aarhusimi Kalaallit Illuanni isumaginninnermut siunnersortinut ataqatigiissaarisoq, Simon Lynge, siunnersuutissaqarpoq:

- Siunnersuutigaara, angajoqqaat meerallit Kalaallit Nunaanniit Danmarkimut nuuttut kommunimiit allakkamik, meeqqamik ajornartorsiutaannik sukumiisumik nassuiaasumik, nassartassasut. Allagaq taanna Danmarkimi kommunimut saqqummiuttassavaat.

Simon Lynge isumaqarpoq, kalaallit danskillu kommuniisa tamakkuninnga suleqatigiissuteqarnissaat pillugit, kalaallit danskillu isumaginninnermut ministerii isumaqatigiissusiortariaqartut.

Kalaallit meeqqat Danmarkimi najugaqartut isumaginninnikkut navianartorsiortut pillugit Peqatigiiffiup Foreningen Grønlandske Børnip suliniutaa naliliiffigalugu nalunaarusiami makkua qulaarneqarput:

Meeqqat affaat atuareeraangamik meeqqanik allanik qaqutigut pinnguaqateqartarput pinnguaqateqanngisaannarlutilluunniit. Meeqqat pingajorarterutaat atuagarsornikkut sanngiipput. Meeqqat sisamararterutaat atuariartunngitsortarput ilinniagassaminnillu suliarinninneq ajorlutik. Meeqqallu tallimararterutaat inooqataanikkut inuttullu ajornartorsiuteqarput.

Pissutsillu ajorneruleriaannartarput, kalaallit Danmarkimiittut ajornartorsiutiminnik saqqummiussinissamut tunuarsimarpallaartaqimmata.

DR-mi P1-ip Dokumentariata kalaallit meeqqat Danmarkimi najugaqartut isumaginninnikkut navianartorsiortut ullumi sammivai, tassanilu Foreningen Grønlandske Børnimi pisortaq, Sidsel Lea Nielsen, ima oqarpoq,

- Meeqqat sullissiffiusartuni arajutsilluinnarneqarsimasut uani pivavut. Naapeqqaaratsigit matoqqaqaat oqaaseqanngeqalutillu. Meeqqallumi taamaattut meeqqerivinni atuarfinnilu ulluinnarni ulapaarnermi arajutseqqajaaneqartarput, Sidsel Lea Nielsen oqarpoq.

Aammali kommunini puigorneqartartut, peqatigiiffiup Aarhusimi immikkoortuani pisortap, Lisbeth Jensen, misilittagarilersimavaa.

- Aarhusip kommuniani ikiorneqarnissamik pisariaqartitsisorpassuupput. Aammami amerlaqisut kalaallinit nilliallaqqinnerupput, sullissisunillu isiginiarneqarnerusarlutik. Allaanerusumik pissuseqarput, arajutsiuminaannerusarlutillu. Kalaallillu taamaalillutik aanngasilleqqajaasarput. Isumaqarpungalu taakkua eqqumaffigeqqullugit uteriisernissaq pisariaqartoq, Lisbeth Jensen DR-imut oqarpoq.

DR-mi P1-ip Dokumentariata kalaallit meeqqat Danmarkimi najugaqartut isumaginninnikkut navianartorsiortut ullumi sammivaat.