Kalaallit Danmarkimiittut pikkorissartut amerligaluttuinnarput
Kalaallit Danmarkimiittut ”Qaami”-mik taallugu suliffeqalersinnaanissaminnut pikkorissartinneqartut, kalaallinik suli amerlanerusunik soqutigineqaleraluttuinnarpoq. Pikkorissarneq sapaatip akunneri marluk qaangiummata aallartippoq, ippassarlu tikillugu peqataarusuttunik nutaanik takkuttoqartuarpoq. Maannalu pikkorissartut 31-nngorsimasut, Klaus Ebbesen pikkorissaanermi ingerlatsisuusoq siunnersuisoqatigiinnillu Akademos-imeersoq oqarpoq.
Pikkorissanerup siunertarivaa, kalaallit suliffissaaleqisut Københavnimi suliffeqalernissaat, qallunaatoornermik, inuttut ineriartornermik, suliffissarsiornermillu pikkorissartinneqarnermikkut. Pikkorissartut 29-niit 60-it sinnerlugit ukioqartuupput, eqimattanullu agguarneqartarput apeqqutaalluni qallunaatut oqalunnermut qanoq pikkoritsiginerlutik kiisalu qarasaasiamut qanoq pikkoritsiginerlutik.
Klaus Ebbesen oqarpoq pikkorissartut piginnaanimikkut assigiinngitsorujussuusut, tamarmilli assigiissutigigaat, suliffissaaleqisuugamik ikiuutisisartuullutillu.
