Kalaallit Danmarkimiittut persuarsiorsimaqaat
Københavnimi ippassaq pisut siulliuteriartigit:
- Qassit takkunnersut kisitsisinngorlugit oqaatigiuminaappoq, kisianni Kalaallit Illuutaat ulikkaaqqinnaarpoq, silatitsinni aqqusinermut allaat ulikkaaqqinnaarpoq. Naatsorsuutigaarput inuit tusindit tungaaniissimassasut, Vivi Nielsen, Københavnimi Kalaallit Illuutaannit taama ilisimatitsivoq.
Professor Minik Rosing, Inuiattut ullorsiornermut atatillugu ippassaq oqalugiartuuvoq, kingornalu tissaluttuliamut ingerlaaqatigiittoqarpoq unnukkullu arsartartoqatigiit FC- Nanoq-kut aaqqissugaannik nalliuttorsiortoqarpoq. Qiviakkat tamarmik qungujulasut, Vivi Nielsenip oqaatigaa.
- Inuit ukiormanna immikkut ittumik tuppallersimaarput. Ajortoqanngilaq. Peqataasut neriuuteqarpasipput nuannersupilussuarmillu ulloq ingerlanneqarluni, Vivi Nielsen nangippoq.
Odensemi inuit 200-t kalaallit erfalasuanik amusinermi peqataapput erinarsoqatigiittoqarlunilu. Rådhusip tungaanut ingerlaaqatigiittoqarpoq silataanilu ilinniartut sinnerlugit Ivalu Egede Martinsen oqalugiartuuvoq.
Kalaallit Illutaanni Kristian "Aaju" Olsenip eqqumiitsuliai "Generationer", kinguaariit, saqqummersillugit ammarneqarput, Kristian "Aaju" Olsen Inuiattut ullorsiornermi aamma oqalugiartuuvoq.
Aalborgimi kalaallit nalliuttorsiornerat Lindhold Strandparkimi pivoq. Qaannamik kinngusaqattaarnermik takutitsisoqarpoq, puisimik pilattoqarluni Royal Greenlandilu misiliutinik tamulugassiisimavoq. Kalaallit Illuutaanni ualikkut kaffillertoqarpoq, tassanilu unnukkut aamma nerersuaaqatigiittoqarluni.
Århusimi aatsaat taama peqataaffigineqartigisumik Inuiattut ullorsiortoqartoq, forstander Svend Kolte unnersiorpoq. 600-simapput. Århusiminngaanneersuinnaanngitsut aammali Jyllandimi kalaallit allat najugallit nalliuttorsioqataajartorsimapput. Århusillu borgmesteria Nicolai Wammen oqalugiartuusimavoq.
Qularutissaanngilaq Danmarkimi Kalaallit Illuutaanni tamani inuaqerpalaarsimaqisoq.
- Suna tamarmi eqqiagassanngornikuummat, eqqiaareerluta maanna suleqatigiilluta naammasseriaratta nerrisilerpugut. Silageqimmat grillerivugut savatorluta salaatinik assigiinngitsunik akullugit nerissallugit, Vivi Nielsen oqarpoq.
