Kalaallit Danmarkimiittut palasitaarput

Oline Berthelsen, Sisimiuni palasitut atorfeqarsimasoq palasitut atorfimmi nutaami siullersaalluni atorfinitsinneqartoq, Ilageeqarnermut ministeriaqarfiup nalunaarutigaa.

- Ilagiit kalaallit Danmarkimiittut palasissaannik atorfinitsitsisoqarnissaannik qangali kissaatigineqartoq ilagiit danskit naalagaaffiata tapersersugaata naammassisinnaanngorpaa, ministeriaqarfik allappoq.

Vor Frues Sognimi ilagiit sinniisaat, Kalaallit Nunaata Aarhus Stiftillu biskoppiisa aamma kalaallit peqatigiiffiisa kattuffiata Inuit peqatigiillutik Oline Berthelsen atorfimmut toqqarpaat.

Palasinngortup - Aarhusimit sulisussap - kalaallit Danmarkimut nunasisimasut sullissavai. Namminersorlutik Oqartussat palasitut atorfeqartitaat, Jens Kristian Kleist, kalaallinik peqquteqavillutik Danmarkimiittariaqartunik pingaarnertut sullissisuuvoq, soorlu assersuutigalugit pineqaatissinneqarsimasunut inissiisarfimmi Herstedvesterimi inissinneqarsimasut, Rigshospitalimi uninngasutr kiisalu tarnimikkut nappaatillit. Taamatullu suliassanik agguataarisoqarnera Namminersorlutik Oqartussat ukiuni kingullerni sukateriffigisimavaa.

Ilagiit danskit naalagaaffiata tapersersugaata palasimik kalaallimik Danmarkimi atorfinitsitsiniarnerat paamaarunneqarsimaaqaaq. Novembarimi 2011-mi atorfinitsitsisoqarnissaa aalajangiunneqarpoq, ilagiilli danskit naalagaaffiata tapersersugaata aningaasaqarnerat pillugu inatsimmik allanngortitsisoqartariaqarsimalluni, tamatuma kingorna allaffissornikkut piareersarneqarnera aamma sivisusimavoq. Aammattaaq atorfik aappassaanik inuttalerneqarpoq. Juanna Platou inuttut atukkani pissutigalugit atorfimmit tassannga siorna upernaakkut tunuarpoq.

Oline Berthelsen juunip aallaqqaataani atorfinissaaq.