Kalaallit Danmarkimiittut: Palasimik atorfinitsitaqarneq attatiinnarneqartariaqarpoq
Danmarkimi kalaallit 2011 aallarnerfigalugu palaseerunnissaat pitsaanngitsumik kinguneqassammat, naalakkersuisut iliuuseqartariaqartut, Kalaallit Peqatigiiffiisa Kattuffianni Inuit-mi siulittaasuusoq, Bitha Metelmann oqarpoq.
- Nuannertartorujussuuvoq ataatsimoortilluta kalaallisut oqaloqatigiikkaangatta - palasilu takkukkaangat, soorlu nunatsinniit kulturitsinnut atasumik aamma nassataqartutut ittarami, Inuit siulittaasuat oqarpoq.
Napparsimasut sivisoorsuarmik napparsimmavimmi uninngajartortut, napparsimanertik pillugu nunarput piffissami sivisuumi qimassimasariaqartarpaat.
- Uninnganissaq kisiat pinnagu aammali ilaquttatik qimallugit Danmarkimiittartut palasimit najorneqaraangamik eqqissiallannermik migisisaqartarput, Bitha Metelmann oqarpoq.
Aamma tarnimikkut nappaateqarlutik pineqaatissinneqarsimallutillu isertitsisarfinniillutik Danmarkimiittariaqartut aamma puigoqqunngilai.
- Kalaallisut allanik ulluinnarni oqaloqateqarsinnaanngitsut palasimik oqaloqateqartarnerminni aamma naalagiartinneqartarnerminni eqqissinermik imaaliallaannarlugu malugineqarsinnaanngitsumik tunineqartarpullusooq, nangippoq.
Bitha Metelmann aamma oqarpoq, Kalaallit Nunatsinni najugallit Danmarkimi najugaqarnerat eqqarsaatigalugu Namminersorlutik Oqartussat Nunatsinni ilagiinnut aningaasartuutigisartagaasa 2,6 procentiinnai, kalaallit Danmarkimiittut palaseqarnerannut atorneqartartut.
Kalaallit Danmarkimi palaseqaannarnissaat, kalaallit palasiat ullaaq oqaloqatigereerlugu, Siumut sinnerlugu Folketingimi ilaasortap Doris Jakobsenip inassutigaa.
- Paasivara palasip oqaloqatiginerani apersortittarnerit, katittarnerit, kuisittarnerit aamma ilisisarnerit massakkut amerligaluttuinnartut. Taamaammat kalaallit palasserunnissaat kalaallinut Danmarkimi najugalinnut annertoorujussuarmik eqquisussaavoq, Doris Jakobsen oqarpoq.
Kalaallit palasiannik oqaloqateqarnermini aamma paasitinneqarpoq, Rigshospitalimi palasit pingasut napparsimasunik oqaloqatiginnittartuusut ernumalereersut.
- Kalaallit palasit Rigshospitalimi suliaqartitaajunnaarpata, taava kalaallisuinnaq oqaasillit qanoq sullinneqarnissaaq assorujussuaq ernummatigineqarpoq, Doris Jakobsen naggasiivoq.
Kalaallit Danmarkimi palasiatut atorfik Naalakkersuisut 2011-miit atorunnaarsinniagaat, inatsisartut 2010-mut aningaasanut inatsisissaq aqagu aappaassaaneerlugu oqallisigilerpassuk, taasissutiginerani itigartinneqassasoq, Doris Jakobsenip aamma kaammattuutigaa.
