Kalaallit Danmarkimiittut palaseqalerput

Oline Berthelsen kalaallinut Danmarkimi najugalinnut palasiussaaq, atorfik taanna 1 juni pilersinneqarpoq,  pisortatigoortumilli palasitut ivertinneqarnera ullumi pivoq.

Palasitut ivertinneqarnerani oqaluffik naalagiartunik ulikkaangajaaveqqavoq, aviisi sermitsiaq taama allaaserisaqarpoq.
Palasitut ivertitsineq sioqqullugu domprovst Poul Henning Bartholin Oline Berthelsen pillugu oqalugiarpoq, domprovstip nuannaarutigaa kalaallit danmarkimiittut maanna palaseqalermata kuisitsisoqartillugu nerliiviliartoqartillugu  kalaallimik palaseqarlutik naalagiarsinnaanngormata.

- Nerliiviliartitsisarnerit  upperisamillu nassuerutiginninnerit nammineq oqaatsit atorlugit paasineqarnerusarput. Taamaattumik isumalluarnarpoq kalaallit ilagiit  palaseqaqqilermata. Pilluaritsi Aarhusimi domprovst Poul Henning Bartholin oqarpoq.

Oline Berthelsen Danmarkimi kalaallinut palasitut sulinermini Aarhusimi angerlarsimaffeqassaaq.

Juaanna Platou siorna upernaakkut peqquteqavissorluni atorfimmit tunuartariaqarsimavoq, kingorna taartissaanik atorfinitsitsiniarnermi pissutsit sakkortuumik isornartorsiorneqarput, nunatsinnit Danmarkimut nuunnermi  pisattat assartornissaannut akiliussisoqarumanngimmat, Oline Berthelsenilli oqaatigaa tamanna aaqqiissuteqarfigineqarsimasoq:   
- Danmarkimi ilageeqarnermut ministeriaqarfiup pisattanik assartuineq aammalu angalanera akilerpaa  Ineqarnissamulli tunngatillugu, nammineerluta inissarsiortariaqarpugut. Qujanartumilli Oline Berthelsen uialu inissarsereersimapput, sulilernissanilu qilanaaraa.

- Palasitut suliassat assigiinngitsorpassuupput, kuisitsinermit apersortitsinermut, nalinginnaasumillu Danmarkimi kalaallit naalagiarnermik sullinnissaat. Tamannalu qilanaarisupilussuuara, Danmarkimi ilagiit kalaallit palasissaat ullumilu palasitut ivertinneqartoq  Oline Berthelsen, marsip qaammataani KNR-imut taama oqarpoq.

Oqaluffimmi Vor Frue Kirkemi naalagiarnerup kingorna Aarhusimi Kalaallit illutaanni kaffillertoqarpoq.