Kalaallit Danmarkimiittut paasisititsiniaaffigineqartut
Kalaallit Danmarkimi najugaqartut inuiqatigiinnut akulerunnerulernissaat pillugu paasisitsiniaaneq, bussinik angallateqarluni ingerlanneqartoq ullaaq manna naammassivoq. Bussinik paasisitsiniaaneq ulluni sisamani ingerlanneqarpoq, Danmarkimilu illoqarfiit annerit Aalborg, Århus, Esbjerg, Odense Københavnilu angalaarfigineqarlutik.
Kalaallit inuiaqatigiinnut danskinut akulerunnerunissaat pillugu paasititsiniaanermi inunnik isumaginnermik sammisaqartut 20-t peqataapput.
Taakku bussinik angalaarnerminni illoqarfinni tikitaminni kalaallit illui pulaartarpaat kalaallinillu oqaloqateqartarlutik.
Paasititsiniaanermi aqutsisoq Kristian Wedel Andersen, Danmarkimi Isumaginninnikkut Inerisaavimmeersoq oqarpoq angalaneq iluatsilluarsimasoq. Oqaatigaa illoqarfinni tikitaminni ataatsimiititsisarnerminnut tamatigut orniguttut 40-t missaaniittartut.
- Kalaallinik Danmarkimiittunik isumaginninnikkut pitsaanersumik qanoq sullissisinnaalernissatsinnut isumassarsianik tuniorarneqarluarpugut, Kristian Wedel Andersen unnersiorpoq.
Paasisitsiniaasut Københavnimut apuussimalerput, Københavnillu isumaginnernermut borgmesteria Bo Asmus Kjeldaard kalaallit Illuutaanni ataatsimeeqatigissavaat.
