Kalaallit Danmarkimiittut Nunatsinnut suliartortikkusuppaat

Kalaallit Nunaanni qaffasissumik ilinniagalinnik sulisussarsiortarneq, nittartakkani sulisussanik pissarsiorfinni takussaavoq.

Namminersorlutik Oqartussat suliffeqarfiutaanni ilinniarluarsimasunik sulisussarsiorneq annertuvoq. Sivikinnerusumik atorfinitsinermi nunanit allamiut sulisorineqartarput, taakkunannga amerlanerit Danmarkimeersuullutik.

Kalaallit ilinniarluarsimasut Danmarkimi najugaqartut Kalaallit Nunaanni sulilersinnissaat ajornartorsiutaasoq, Juliane Henningsen IA sinnerlugu,  folketingimi atlantikup avannaani suleqatigiinni ilasortaq oqarpoq.

- Ilinniarluarsimasunik sulisinnaasunik amigaateqarneq Kalaallit Nunaanni unamminartut annerit ilagaat. Kalaallit ilinniagaqarluartut amerlasuut Danmarkimi najugaqarput, Kalaallit Nunaanni suliffeqarfiit inuttassarsiorneqartut taakkua suliffigisinnaalluarpaat, Juliane Henningsen tusagassiuutinut nalunaaruteqarluni allappoq.

Danmarkimeersunik sivikitsumik sulisoqartarneq pinngitsoorneqarsinnaanngilaq, kisianni Kalaallit Nunaanni suliffeqarfinnut arlaqartunik kinguneqartitsisarpoq:

- Inuiaqatigiinnik ilisimasaqartunik kalaallisut tunuliaqutaqartunik  siunissami sulisoqalersinnaaneq, minnerunngitsumillu Kalaallit Nunaannut nuukkusuttunik sulisoqarsinnaaneq, kissaatiginartinneqarpoq, taamaalilluni Kalaallit Nunaata namminiilivinnissaata ineriartortinneqarnissaanut iluaqutaassammat, Juliane Henningsen oqarpoq.

Atlantikup Avannaani Suleqatigiit kalaallit Danmarkimiittut pillugit misissuisitsinerannit pingasuusunit takutinneqarpoq, kalaallit Danmarkimi najugaqartut 18.500-uusut, taakkunannga kalaallinit kingoqqisut 3100-uullutik, taakkualu Kalaallit Nunaanni suliffeqarfinni sulilersinnaalluartut.

Kalaallit Danmarkimi najugaqartut 80 procentii ilinniarluarsimasuupput, taakkualu atorfinnut inuttarsarsiuunneqartunut sulilersinnaalluartut, misissuisitsinermi paasineqarpoq.