Kalaallit Danmarkimiittut inuiaqatigiinnut akulersinniarnissaat pitsaanerulissasoq ministerip neriorsuutigaa
Inooqataaniarnikkut ajornartorsiutillit pillugit Isumalioqatigiissat nalunaarusiaanni nutaami inerniliussat ilagaat kalaallit Danmarkimiittut isumaqartut Danmarkimi kalaaliulluni ikiortissarsisinnaaneq ikioqqunissarlu ajornakusoorsinnaasut. Ministerillu tamanna ilisarisinnaanerarpaa.
- Danskitut innuttaassuseqartilluni maluginiarneqarnissaq ungasinnerulaartarpoq, aamma kalaallit danskillu kulturikkut assigiinngissuteqarsinnaanerat pisortat tungaannit tamatigut isiginiarneqartanngilaq, naak tamanna pisussaagaluartoq. Inooqataaniarnikkut ikiortariaqarnerpaat ikiorserneqarnissaannut tamanna ilanngunneqartariaqartutut isigaara.
Danskit isumaginninnermut ministeriat Manu Sareen taama oqarpoq. Kalaallit inooqataaniarnikkut ikiortariallit ikiorserneqarnissaannut periusissamik danskit naalakkersuisui suliaqarsimapput, taannalu ilaatigut kommunit namminersortullu sulinitaasa suleqatigiissutiginissaannik qulakkeerisussaavoq SFI-llu misissuineratigut susassaqarfik ilisimasaqarfigineqalissalluni. Manu Sareenillu periusissaq misissuinissarlu isumalluarfigai.
- Susassaqarfiup immikkut sammineqarnissaanut ajornartorsiutillu qaangerniarnissaannut aningaasanik nassaarsimanerput nuannaarutigisupilussuuara.
Periusissamik isornartorsiuisut oqaatigaat kalaallinik ikiortarialinnik sulississunut aningaasaliissutaasartut amerlavallaanngitsut.
- Aningaasat naammannersut akissuteqarfigissallugu ajornakusoorpoq, isumaginninnikkummi suliaqarnermi qaqugu suna naammannersoq uuttortassallugu ajornakusoortuummat. Aningaasalli 13.4 millionit koruunit periusissamut atugassatut pissarsiarisimasagut pitsaanerusumut tikkuussisussatut isigaakka. Tassungaannaq aamma unittoqarnavianngilaq, misissuisoqartussaavormi misissuinermilu angusat ilisimasanik toqqammavigisassatsinnik pitsaasunik pissarsiffigissavagut.
Ilaqutariinnermut Naalakkersuisup Martha Lund Olsenip periusissaq naammaginartippallaanngilaa. Danskit naalakkersuisui annertunerusumik iliuuseqartariaqarsorai.
- Naammassasorinngilara. Annertunerusumik iliuuseqartoqartariaqarpoq - kommunini assigiinngitsuni tigussaasumik suliniuteqartoqarluni.
Folketingimut ilaasortap Sara Olsvigip (IA), ullumi ataatsimeersuarnermi nammineq najuussinnaanngitsup avataaniilli malinnaasup, oqaatsip inuiaqatigiinnut akuulersitsinissap atorneqalernera nuannaarutigalugu oqaatigaa.
- Kalaallit inuiaqatigiinnut akuulersinnissaannik oqalunneq nutaajuvoq, tamannalu nuannaarutigaara, siornatigummi oqaaseq taanna atornaveersaarneqartarmat.
Ministerimut maanna apeqquteqaateqarniarpoq, oqaatsip kalaallit inooqataaniarnikkut ajornartorsiortut pillugit periusissamut ilanngunneqarnissaa isumagerusunneraa apeqqutigalugu.
