Kalaallit Danmarkimi takutitseqataapput
Øksne Hallenimi Københavnimiittumi atisanik mutinik upernaaru ukiullu tulliani atisanik tunisassanik takutitsineq ingerlanneqaleruttorpoq. Kalaallit atisaliortartut Isaksen Design atisanik takutitsisunut 320-iusunut ilaapput.
- Ulapeqaagut, upernaaru pisiassatut atisaliagut Polenimi mersortitagut tikinngitsuungajakkamik, maannali tikipput, Rita Isaksen raadioaviisimut oqarpoq. Ukiut pingajussaat Isaksen Design Københavnimi mutinik takutitsinermi ukiumut ataasiarluni ingerlanneqartartumi ilaapput. Takutitsineq nunarsuarmi atisalerituunit ornigarneqartarpoq.
- Tassa maani pisisartugut New Yorkimiittut attaveqarfigaavut, Rita Isaksen oqarpoq.
Pisisartut tusagassiortut mutinillu aallartitsisartut 30000-it missaat ullut tulliuttut sisamat Øksne Hallen aqqusaassagaat naatsorsuutigineqarpoq. Sapaatiuppat takutitsineq naammassissaaq.