Kalaallit Danmarkimi palasiat suli oqallisigaat
Siumup inatsisartuutitaasa akuersaarsinnaanngilaat Danmarkimi palasi ilisimatinneqarsimammat, palaseqarneq 2011-mi aningaasanut inatsimmiissanngitsoq, inatsisissaq Inatsisartunit oqallisigineqarlunilu akuerineqartinnagu.
- Naalakkersuisut eqqaamasariaqarpaat aningaasanut inatsit tassaammat Inatsisartut aningaasanut inatsisaat, taannalu Naalakkersuisunit siunnersuuteqarnikkut inatsisartunut apuunneqassaaq, Inatsisartunit suliarineqaqqaarluni inernissaa aamma Inatsisartunit aalajangerneqartussaq, Siumup inatsisartuni ilaasortaatitai tusagassiuutinut allapput.
Atassut aamma pisumut naammaginninngilaq. Atassutip siulittaasuata, Gerhardt Petersenip Naalakkersuisut kaammattorpai, Danmarkimi palasip aningaasalersorneqarneranut kontop pingaarnerup ammaqqinneqarnissaa Inatsisartut Aningaasaqarnermut ataatsimiititaliaanut qinnutigissagaat.
Naalakkersuisut siulittaasuata, Kuupik Kleistip, ippassaani erseqqissarpaa, Danmarkimi kalaallit ilagiit siunissami palaseqartuassasut.
Kuupik Kleistili massakkut allamik oqaaseqarusuppallaanngilaq, isumaqatigiinniarnernut massakkut ingerlasunut tamanna akornutaaqinammat.
