Kalaallit Danmarkimi palasiat soorunami kalaallisut oqalussinnaasariaqarpoq
Doris Jakobsenip (S) palasip atorfinittussap, ilagiit sullitassani assingalugit, kalaallisut oqaaseqartuunissaa qulakkeerniarlugu ministerimut attaveqarsimavoq. Atorfimmut piumasaqaatit ersarissarnissaat anguniarlugu Doris Jakobsen ministerimut allagaqarpoq.
-Atorfimmik taama ittumik pilersitsiniarnerup eqqartorneqarnerani atorfinittussap kalaallisut oqalussinnaanissaata piumasaqaataasimanera paasissutissiissutigisinnaavara, kalaallimmi nammineq piumassutsiminnik Danmarkimi najugaqartut sullinneqartussaapput. Atorfinitsitsinermi ilaatigut siunertarineqarpoq palasip kalaallisut naalagiartitsillunilu tarnikkut kiffartuussinissaa, Manu Saren politikerimut Siumumeersumut akissuteqarluni allappoq.
Atorfimmut piukkunnarsinnaasumik Danmarkimi nassaarnissap ajornakusoorsinnaanera Doris Jakobsenip siumut takorlooreersimavaa, taamaattumillu Kalaallit Nunaanni pissarsiornissaq nuunnermilu aningaasartuutinik akiliinissamut periarfissaq eqqaasimallugu. Ministerili tamanna maannakkorpiaq neriorsuutigisinnaanngikkallarpaa. Taamaakkaluartoq Doris Jakobsenip naammagisimaarinnippoq.
-Akissutaa pitsaasuuvoq, ministerimillu taamatut akissuteqarfigineqarnera nuannaarutigalugulu naammagisimaarpara. Kalaallit nammineq piumassutsiminnik Danmarkimi najugaqalersimasut kalaallisut oqalussinnaasumik palaseqartinnissaat aallaqqaataaniilli pingaartitaraara. Oqaatsit suliami matumani qitiulluinnarput. Taamaammat ministerip tamatuminnga paasinnilluarnera attataqarneralu, aamma immikkut suliniuteqartoqarnissaanik pisariaqatitsissagaluarpat, eqqissiallannarpoq, Doris Jakobsen oqarpoq.