Kalaallit Danmarkimi palasiat sipaarutaalerpoq
Kalaallit palaseqarnerata sipaarutiginissaanik aalajangiineq kalaallinit Danmarkimi najugaqartunit eqqumiigineqarpoq. Tassami Naalakkersuisut siulittaasuata siorna ukiakkut neriorsuutini allanngortimmagu.
Novembarip qulingani 2009-mi tusagassiortunik katersortitsinermini, Kuupik Kleist imatut oqarpoq:
- Kalaallit Danmarkimiittut palaseerunnavianngillat, aamma neriorsuutigaarput aappaaguminngaanniit aaqqiissutissanik nutaanik nassaarsinnaassalluta, kalaallit Danmarkimi palaseqarnikkut kiffartuunneqarnerat pitsaanerulersissinnaassallugu, Naalakkersuisut siulittaasuat Kuupik Kleist taamani oqarpoq.
Neriorsuuteqarnerata kingorna qaammat ataaseq qaangiummat palasi Jens Kristian Kleist Ilageeqarnermut pisortaqarfimmiit allagarsivoq, palasip atorfia 2011-mi januaarip aallaqqaataaniit aningaasanut inatsimmut ilaajunnaartoq.
Pisoq pillugu Kalaallit peqatigiiffiisa kattuffianni INUIT-mi siulittaasoq Bitha Metelmann ima oqarpoq:
- Kalaallit inuisa sisamararterutaat Qallunaat Nunaanni najugallit, qaammatit qulit qaangiuppata palaseerutissapput, tupinnarluinnaqqissaarpoq.
- Naalakkersuisut neriorsuigaangamik neriorsuutitik eqquutsinniartussaavaat, taamaammat tupigilluinnarparput Kuupik Kleistip miserratigalugu oqaaseqarsimammat, tamanna ajorluinnarpoq, Bitha Metelmann oqarpoq.
- Nammineq kissaatiginagu Danmarkimut inissinneqarsimasunut tamanna erloqinassaaq, soorlu tarnimikkut nappaatillit, minnerunngitsumillu napparsimasut katsorsartikkiartortut, Bitha Metelmann naggasiivoq.
