Meeqqat quliniit qummut ukiullit 40 –t Langelandimi maannakkorpiaq aasarsiorput assigiinngitsunik sammisaqartinneqarlutik. Kalaallit meerartaat Danmarkimi tamaneersut peqatigiiffiup ”Kalaallit Meerartaat”- a aaqqissugaanik aasarsiortinneqarput assigiinngitsorpassuarnik sammisassaqartinneqarlutik. Sissaq, orpippassuit unnukkullu ikumaartitsinerit ilaatigut misigisassaapput.
- Nuna tamakkerlugu aaqqissuussaq siullerpaamik ingerlanneqarpoq - generalsekretærip Marianne Jensenip oqaatigaa. Ukiullu pingasut tulliuttut ukiumoortumik aasarsiortitsisoqartarnissaa siunniunneqarpoq.
Socialministereqarfiup suliaq aningaasaliiffigaa, meeqqat allamik periarfissaqanngitsut, inuiaqatigiinnullu akuliunnissamik ajornartorsiutillit aasarsiornissaannik misigitinniarlugit.
- Meeqqat aasarsiortinneqarnerat ukiut pingasut tulliuttut meeqqat ilaqutariinnit ajornartorsioreersunit imaluunniit Danmarkimi inuiaqatigiinnut akuliunniarnermik ajornartorsiortunut neqeroorutaavoq. Anguniarparpullu ukiut pingasut taakku qaangiuppata danskit oqartussaasa suliaq aalajangersimasumik ukiumoortumik neqeroorutissanngorlugu tigussagaat, nalunanngimmammi pisariaqartinneqartoq, Marianne Jensen, radioaviisimut oqarpoq.
Aasarsiortsitsineq sapaatiummat aallartittoq tallimanngorpat naammassippat meeqqat ilaquttaminnut Danmarkimi tamaneersunut angerlakaassapput.
