Kalaallit Danmarkimi ilinniartut Namminersorneq pillugu paasititsiniaavigineqalerput

Kalaallit Danmarkimi ilinniagaqartut Namminersorneq pillugu Kalaallit Nunaanni taasisitsinissaq pillugu annerusumik paasititsiniaavigineqalerput. Atlantikup Avannaani Suleqatigiit ilinniartut qaaqqullugit ataatsimiititsisassapput, taasisitsinissallu tunuliaqutaa Kalaallillu Nunaannut sunniuteqaatissai paasititsiniutigineqassallutik.
Allattoq Mads Lynge
oktobarip 07-at 2008 18:20

Marloriarluni ataatsimiititsisoqassaaq. Siullermik Århusimi novembarip ulluisa sisamaanni, Københavnimilu novembarip ulluisa arfernanni aappassaanik ataatsimiititsisoqassalluni.

Namminersornerullutik Oqartussani Namminersorneq pillugu allattoqarfiup pisortaa Mininnguaq Kleist Namminersorneq pillugu paasititsiniaassaaq, inuiaallu pisinnaatitaaffiinik ilisimasalik professor Ole Spiermann, Københavnip Universitetianeersoq, inuiaat pisinnaatitaaffiit pillugit paasititsiniaassalluni.

Namminersorneq pillugu innuttaasunut taasisitsinermut taaseqataaniaraanni, Danmarkimilu najugaqarluni, taava Kalaallit Nunaanni kommunerisap qinersisinnaatitaasut allattorsimaffiinut kingusinnerpaamik oktobarip ulluisa 14-ianni allatsimanissaq piumasaqaataavoq.

Qinersisinnaanissamik qinnuteqaateqarniaraanni immersugassaq www.dnag.dk-mi aaneqarsinnaavoq. Taasisinnaatitaaneq pillugu paasissutissat, Namminersornerlu pillugu paasititsiniaanissat pillugu annerusumik paasiniaasoqarsinnaassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq