Kalaallit Danmarkimi ilinniartut ikileriartut
Kisitsisit kingulliit, KNR-ip Ilinniartitaanermut Naalakkersuisoqarfimmit pissarsiarisaata, takutippaat Nunatsinneersut Danmarkimi ilinniakkanut ingerlariaqqiffiusunut ukioq manna aallartittut 20 procentingajannik ukiup siulianut sanilliullugit ikileriarsimasut.
2015-imi 201-it ilinniakkamik aallartitsisimapput, 2016-imilu 163-iullutik.
Bachelorinngorniarfiusuni kandidatinngorniarfiusunilu aallartittut ikileriarput, ilinniakkani ingerlariaqqiffiusuni sivikinnerusuni aallartittut amerlerialaarsimallutik.
Københavnimi eqqaanilu ilinniarlersut ikileriarnerpaasimapput, tassa 2015-imi 73-iugamik ukioq manna 50-iullutik.
Ilinniakkamilli aallartitsisut Danmarkimi kisimi ikilerianngillat, tassami Nunatsinni aamma ikileriarsimagamik. Ukioq manna Nunatsinni ilinniakkanut ingerlariaqqiffiusunut aallartittut 298-iupput, siorna 327-iullutik. Ikileriarnerit bachelorinngorniartuniipput.
- Ilinniakkani ingerlariaqqiffiusuni aallartittut ikileriarsimanerinut pissutaasinnaavoq 2015-imi GUX-imi soraarummeertut ikileriarnikuummata. Tassami ilinniartut ingerlariaqqinnissaminnut periarfissallit ikinnerummara, ilinniartitaanermut naalakksersuisoq KNR-imut nassuiaavoq.
Naalakksersuisut ilinniartitaanermut pilersaarutaanni pingaartitat ilagaat ilinniartut naammassisartut amerlisinnissaat kiisalu pitsaanerusumik siunnersorneqartalernissaat. Taamak suliniuteqarnerup, Nivi Olseni naapertorlugu, kinguneranik ilinniartut ilinniarusutaminnik aallartitsillutillu naammassisaqartassasut. Tamannalu piffissap ilaani ilinniakkamik aallartitsisut ikileriarnerinik kinguneqarsinnaalluni.
- Massakkulli tamakku imminnut ataqatigiinnerinik oqaaseqassalluni siusippallaarpoq. Ilinniartitaanermut Naalakksersuisoqarfiup piffissami aggersumi ilinniarlersartut ikiliartornersut malinnaaffigeqqissaassavai, takuniarlugu pisoq immikkuullarissuunersoq imaluunniit ukiuni aggersuni ilinnialersartut ikiliartussanersut, naalakkersuisoq neriorsuivoq.
Kisitsisit saqqummiunneqartut ukiup ingerlanerani allanngulaarsinnaaneri Ilinniartitaanermut naalakkersuisoqarfiup ilisimatitsissutigaa. Tamatumunnga pissutaavoq Danmarkimi ilinniartut ilinniakkamik aallartitsisimanertik Kalaallit Illuutaannut nalunaarutigigaangamikkit aatsaat nalunaarsorneqartarmata. Taamaattorli ilinniakkamik aallartitsisut ikileriarsimaneri naqissuserneqarpoq.
Tabeli 1: Ilinniartut Danmarkimiingerlariaqqiffiusuni augustimi septemberimilu aallartittut.
| 2012 | 2013 | 2014 | 2015 | 2016 |
Ingerlariaqqiffiusut sivikinnerusut | 35 | 34 | 50 | 32 | 42 |
Bachelor | 142 | 136 | 125 | 145 | 108 |
kandidat | 16 | 21 | 18 | 24 | 13 |
Ilinniakkat ingerlariaqqiffiusut | 193 | 191 | 193 | 201 | 163 |
2016 | Ålborg | Århus | Odense | København | I alt |
Ingerlariaqqiffiusut sivikinnerusut | 5 | 14 | 12 | 11 | 42 |
Bachelor | 22 | 40 | 14 | 32 | 108 |
kandidat | 4 | 2 | 0 | 7 | 13 |
Ilinniakkat ingerlariaqqiffiusut | 31 | 56 | 26 | 50 | 163 |
2015 | Ålborg | Århus | Odense | København | I alt |
Ingerlariaqqiffiusut sivikinnerusut | 2 | 10 | 8 | 12 | 32 |
Bachelor | 28 | 50 | 20 | 47 | 145 |
kandidat | 6 | 4 | 0 | 14 | 24 |
Ilinniakkat ingerlariaqqiffiusut | 36 | 64 | 28 | 73 | 201 |
Tusarfik: Namm. Oqartussat
Tabeli 2: Ilinniartut Nunatsinni ingerlariaqqiffiusuni augustimi septemberimilu aallartittut.
Nunatsinni | 2012 | 2013 | 2014 | 2015 | 2016 |
Ingerlariaqqiffiusut sivikinnerusut | 41 | 46 | 50 | 66 | 66 |
Bachelor | 253 | 215 | 227 | 250 | 222 |
Kandidat | 4 | 3 | 10 | 11 | 10 |
Ilinniakkat ingerlariaqqiffiusut | 298 | 264 | 287 | 327 | 298 |
Tusarfik: Namm. Oqartussat
Uani tikkuut illoqarfiit nalaanukartillugu piffimmi paasissutissat atuarsinnaavatit
