Kalaallit Danmarkimi ilinniagaqartut akikillisaavigineqarsinnaanngillat
Kalaallit Danmarkimi ilinniagaqartut akikillisaavigineqarnissaminnut mattunneqarput. Danmarkimi Kalaallit Ilinniagaqartut Kattuffiat Folketingimi ilaasortanut danskinut kalaallinullu ammasumik taama qulequtserlugu allagaqarpoq.
Danmarkimi ilinniagaqartut DSB-p qimuttuitsuinut bussiinullu ilaanerminni bilitsinut akikillisaatinik pisinnaalernertik nuannaarutigeqaat – tassa aammattaaq 26-nik ukioqalereeraluarlutik akikillisaavigineqarsinnaaleramik. Taamatulli akikillisaavigineqarsinnaaneq kalaallinut ilinniagaqartunut Danmarkimi najugalinnut atuutinngilaq. Taamatullu qaangiinnarneqarnertik nuannarinngilaat.
Kalaallit ilinniagaqartut maanna akikillisaavigineqarsinnaanngereerput, naak danskit ilinniagaqartut qimuttuitsunut bussinullu naalagaaffiup ingerlataannut akikillisaavigineqarsinnaasut. Folketingip akikillisaavigineqarsinnaasut ilinniartuunersiuteqarnermut uppernarsaateqarnissaat aalajangersarsimavaa.
- Maanna kalaallit ilinniagaqartut danskit naalagaaffiannit ilinniartuunersiuteqannginnerat Folketingimit puigorneqarsimasoq paasinarsivoq. Taamaalilluta akikillisaavigineqarsinnaanngilagut, Parnuuna Egede – Danmarkimi Kalaallit Ilinniagaqartut Kattuffianni siulittaasuusoq oqarpoq.
Siornatigut kalaallit ilinniagaqartut Danmarkimiittut Namminersornerullutik Oqartussanit angalanermut tapiiffigineqartaraluarput, siornali aaqqissuusseqqinnermut atatillugu tapiiffigineqartarunnaarput.
Taamatut kalaallit akikillisaavigineqarsinnaannginneranni eqqugaanerpaat tassaapput Københavnimi eqqaanilu ilinniagaqartut, tassa inissaaleqineq patsisigalugu ilinniarfimminnit ungasissumi najugaqartariaqartartut. Tassa kalaallit ilinniagaqartut, danskisut innutaassuseqaraluarlutik akikillisaavigineqarsinnaanngillat, naak ilinniaqataat danskit savalimmiormiullu akikillisaavigineqarsinnaasut.
- Avataaniit nunasisut inuiaqatigiinni ilaatinneqalernissaat oqallisigineqaqaaq, peqatigisaanilli kalaallit naalagaaffimmi innuttaaqataasut puigorneqartarput. Kalaallit ilinniagaqartut taamatut immikkoortitaanissaat pissusissamisuunngilaq, Parnuuna Egede oqarpoq.
- Danmarkimi kalaallit ilinniagaqartut Kattuffiannit danskit kalaallillu Folketingimut ilaasortaasut akikillisaasinnaanermut aaqqissuussinermut nalilersueqqeqqullugit kajumissaarpavut, Parnuuna Egede naggasiivoq.
Kalaallit Danmarkimi ilinniagaqartut maanna 402-nik amerlassuseqarput affaallu 26-t sinnerlugit ukioqarlutik.
