Kalaallit Danmarkimi ikiorserneqartarnerat nersorneqarpoq

- Illoqarfimmi kalaallinik sullissisut attavigineqarnissaat ajornannginnerulersimavoq.

Esbjerg kommunimi suleqataasoq Paninnguaq Kristiansen oqarpoq. 

Socialstyrelsep 2013-imi kalaallinut inuuniarnikkut ajornartorsiuteqartunik taaneqartartunut suliniut aallartippaa, Danmarkimi illoqarfiit annerit tallimat, suliniaqatigiiffiillu akornanni suleqatigiinnissaq qanillisinniarlugu.

Esbjergimut kalaalermik tikittoqarpat inuit allattorsimaffiat nalunaarfigineqassaaq. Tikerlaaq tikilluaqqussummik allagarsissaaq Paninnguaq Kristensenilu ataatsimeeqatigissavaa, paasiniarlugu ilumut Danmarkimi inuunissamut piareersimanersoq.

- Aningaasanngorlugit ikiorneqarnissamut qinnuteqarnermut, meeqqalluunniit meeqqerivimmiiffissaannut, inissiamilluunniit qinnuteqarnermut utaqqisunut allatsillugit. Imaluunniit peqqinnissaqarfimmut saaffiginninnissaq pisariaqartinneraat.

Arnaq sullissisoq isumaqarpoq suliniuteqarsimaneq arlalitsigut iluaqutaasimasoq. Assersuutigalugu kalaaleq angut ilaquttani malinnittussanngorlugit Danmarkimut siuarsimasoq.

- Ilaqutaasa tikinnissat sapaatip akunneranik sioqqullugu attavigaarput, suli ilaquttani inissaqartinngikkai. Tassani Foreningen Grønlandske Børn qujanartunik suleqatigalugit piaartumik pisariaqartinneqartut aaqqiivigaavut, ilaqutai tikikkunik ornitassaqarniassammata.

Aammattaaq Foreningen Grønlandske Børnimi vicegeneralsekretær Puk Draibyp suliniutip kommuninik suleqateqarnermut iluaqutaanera malugisimavaa:

- Ima paasivara, kommunit ilanngulluta oqaloqatiginninnissamut aggeqqusisarnerisigut ajornartorsiutit toqqaannarnerusumik aaqqiivigisinnaalersimavagut.

- Eqqarsarpunga, naliginnaasumik suliniutinik qaffassaasoq, aammalu suleqataangaangatta kommunit sullissinerat qaffattartoq.

Kalaallit Illuutaanniit suliniut aamma nersualaarpaat. Odensimili pisortaq Kirsten Mærsk ernummateqarpoq, ikiuisarnerit tamaallaat pitsaasuussasut kommunit naalagaaffimmiit aningaasalersorneqartillugit:

- Grønlænderstrategimik taasaq aningaasassaarunneqaraluarpat. Taava kommunit immikkut Socialministeriamiit aningaasalersorneqarunnaarpata - taava taamaateqqissaaq. Neriuutigaarpulli takusinnaassagaat ajornartorsiut taanna iliuuseqarfigisariaqartoq.
Kommunit tallimat 2016-ip tungaanut suliniummut aningaasaliiffigineqartussaapput, tassaasut Odense, Aarhus, Esbjerg, Aalborg aamma København.