Kalaallit Danmarkimi atugarluttortaqarnerupput
Kalaallit Fynimi inuuniarnikkut atugarisaat pillugit Odensimi Kalaallit illuata, nalunaarusiaa ullumikkut saqqummersinneqassaaq.
Nalunaarusiami oqaatigineqarpoq kalaalerpassuaqartoq Danmarkimi inuuniarnikkut ajornartorsiuteqanngitsunik aammalu inuiaqatigiinnut ilanngutivissimasunik, nalunaarusiamili oqaatigineqarpoq, Danmarkimi kalaallit akornanni ilaqartoq inuuniarnikkut inuiaqatigiinnullu akulerussinnaanermut naalliuuuteqartunik.
Kisitsisit Odensimi Kalaallit illuanit pigineqartut takutippaat, Danmarkimi inuiaqatigiinnut allanut naleqqiullugit Fynimi kalaallit suliffissaaleqilersartut amerlanerusut, suliffissaaleqisullu ikittuinnaat sulilluarnerulersarniarlugit pikkorissartinneqartartut.
- Qangali taamaattoqarnera ilimagisimavarput, maannakkullu kisitsisinik uppernarsaatissaqalerluta, Odensi-mi kalaallit illuata forstanderia Kirsten Mærsk oqarpoq.
Kalaallit Danmarkimi peroriartorlutillu inunngorsimasut suliffissaaleqinerusarnerat kisitsisini takuneqarsinnaavoq, assersuutigineqarpullu danskiviit, nunanilu allaniit Danmarkimut nussorsimasut meerartaat atugarissaarnerusut. Kalaallinik siuaallit danmarkimi najugaqartut suliffissaaleqisortai 19 procentiupput, assersuusiarineqartumilu nunanit allamiut nussorsimasut kinguaavisa 9 procentiinnai suliffissaaleqisuullutik. Danskit suliffissaaleqisut 5 procentiinnaapput.
Kalaallit illuanni pisortaq Kirsten Mærsk isumaqarpoq kalaallit danmarkimi inuiaqatigiinnut akulerutsinniarlugit immikkut iliuuseqartorqartariaqartoq.
