Kalaallit Danmarkimi angerlarsimaffeqanngitsut ornitassaqalissapput

Danmarkimi Kofoed skole-mi siunnersortitut sulisoq nammineq piumassutsiminik kalaallinut nakkaassimasunut ikiuiniarnermigut folketingimiit 8 mio. koruuninik tapiiffigineqarpoq.

Erik Seidelin Christensen ukiut 40 missaanni Kalaallit Nunaannut tunngassuteqartunik suliaqartarpoq, maannalu inuit ingerlariaqqissimanngitsut ornittagaanni Kofoed Skolemi siunnersortitut sulilluni. Suliffimmi saniatigut nammineq piumassutiminik kalaallit angerlarsimaffeqanngitsut ornitassaqanngitsullu sullikkusullugit aningaasanik qinnuteqarsimavoq. Taassuma kalaallinut ikiuinissaanut katillugit 8 mio. koruunit tapiissutigineqarput, taakku ukiumut 2 mio. koruunikkaarlugit tunniunneqartassapput.

- Aningaasat kalaallinut nakkaassimasunut ulloq unnuarlu ornissinnaasaannut atorneqassapput. Københavnimi kalaalerpassuaqarpoq, atugarissaarpiaratik piffissap annersaani imerniartarfimmeerusaartuartunik. Taakku ilarpassui angerlarfissaqanngillat, imerniartarfiillu ulloq unnuarlu ammasartut isersimaffigerusaartarpaat. Maani ulloq unnuarlu ammasartunik kalaallit immikkut ornissinnaasaannik soqanngilaq, taakku ornissinnaasaannik ulloq unnuarlu kaffisorfiusinnaasumik eqqissisimaarfigisinnaasaannillu peqartariaqarpoq, taamaalillutik ikiaroorusaarlutillu aalakoorusaarfissaraluat ajunnginnerusumut saatinniarsarineqarsinnaavoq, taama oqarpoq Erik Seidelin Christensen.

Taanna erseqqissaavoq, inuit pineqartut nakkaalluinnarsimasuusut, tassaallutillu ajornartorsiutiminnik paasineqarusullutik kalaaleqatiminnik naapitassarsiortartut, naapitsissagunillu imerniartarfiit ornikkusunnerusaraat.

- Imerniartarfiit taamatut naapitsiffigissallugit pitsaanerpaajunngillat, kalaallillu tamakku ataatsimoornertik aalajaaffigisorujussuusarpaat tassanngaanniillu kaanngarnaveertarlutik, ornitassaat allanngortikkaanni imerniarfiunanilu ikiaroorniarfiunngippat taava sulissuteqalersinnaapput, Erik Seiden Christensen oqarpoq.

Taassuma naatsorsuutigaa kalaallit 400-t ajornartorsiortut akornanni sisamararterutaat taamatut atugaqartuusut.
Taassuma siullertut suliassarinerarpaa, taama suliamik aallartitsinissaminut suleqatissarsiornissani.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat