Kalaallit Danmark-imi peqqissartut najugaqarfiat mikivallaalerpoq

København-ip ilaani Brønshøj–mi Kalaallit Peqqissartut Illuat napparsimasunik sivisuumik najorneqartartoq mikivallaalersimavoq.

Amerlasuut sivisuumik qanigisaminnik najorteqarnatik tassaniittariaqartarput.

Illu 45 –nik najugaqartitsisinnaavoq amerlanerpaatigulli oqorutsiortitsinikkut 60 –it tikillugit illusimasinnaapput.

Illumi pisortap tullersortaa Susanne Cristensen oqarpoq najugaqartut saniasigut Rigshospital-imi uninngasut 20 –it 40 llu akornanniikkajuttut illumut aamma attuumassuteqartartut.

Ulloriaq Nielsen Maniitsormiu aamma Bent Ole Kleist Qaqortormiu, tamarmik sivisuumik Illumi najugaqarsimasut isumaqarput politikkikkut nalilersuisoqartariaqalersoq.

Uanga pingaartinnerpaavara nunatsinni katsorsarneqartalertuugut, Napparsimmavissuarmi, allatut ajornaqaaq akissaqartinngilarput ilaquttatsinnik najorteqassagaluarutta aamma inissaat tamakku tamarmik akisoorujussuugamik. Akuerineqassanngikkuni nuanniitsortaqarpoq, soorunami ilaquttat najorusunnarnerugaluaramik. Amerlaqaat ilaquttaminnik ilaqarnatik maaniipput Bent Ole Kleist oqarpoq.

Kalaallit Peqqissartut Illuata Brønshøj –mi København –miittup, Hotel-it arfinillit immikkut isumaqateqarfigalugit nunatsinneersunik qanigisaannillu najugaqartitsisarpoq.

Taamatut najugaqartitsisarneq ukiumut 4 – 500 tusind koruuninik aningaasartuutaasarpoq.