Kalaallit arsaattartuisa nunanut allanut unammisartui Cypernimut Avannarlermut unammersuarnerni peqataajartorlutik aqagu aallassapput.
Kalaallit Nunaat Cypernimit Avannarlermit qaaqqusaasimavoq, angalanerallu qaaqqusisut aamma akilissavaat.
Unammisassaat siulliit tassaapput Afghanistan, Kirgisistan aamma Zanzibar.
- Nunani allani unammisarnerni misilittakkatta annertusarneqarnissaannut suli periarfissagissaarnerulissaagut, pissanganartunik naammattoorsinissarput nuannerluinnartumillu tamatta misigisaqarnissarput qularutissaanngilaq, Kalaallit Nunaanni Arsaattartut Kattuffianni siulittaasoq, Lars Lundblad oqaluttuarpoq.
Kalaallit Nunaat Kirgisistanimut sapaatiuppat unammissaaq, qularnanngilarlu tamanna pissanganarluinnartumik ingerlajumaartoq.