Kalaallit Cubamut ualeru unammissapput
Assammik arsarlutik nunanut allanut unammisartut ualeru nunatta nalunaaqutaa 16.00 malillugu Cuba-mut unammissapput.
Kalaallit Nunaani timersortartut kattuffiat Grønlands Idrætsforbund assammik arsarluni unamminerit malinnaaffigineqarnissaanut soqutiginittunut periarfissiivoq. Ualeru Cubamut unamminermi nittartakkami angusat ingerlaavartumik nalunarsorniarpaat. Minutsit 15-it qaangiukkaangata unamminermi angusat allattorneqassapput.
Kalaallit assammik arsarlutik nunanut allanut unammisartui Brasiliamiunut ippassaq unammigamik 23-inik isertitaqarlutik ajorsarput Brasiliamiut 29-inik isertitaqarlutik ajugaasut.
Taamaakkaluartoq kalaallit unammisartuisa sungiussaasuat Jakob Andreassen unamminermi angusanik naammagisimaarinnippoq.
- Brasiliamiut unnammissaq sioqqullugu kalaallit unammisartui pissangappput, tamannalu unamminerup immikkoortuani siullermik takuneqarsinnaavoq, Jakob Andreassen oqarpoq.
- Unamminerup immikkoortua kingulleq ingerlalluarparput, immitsinnut tatigaluta arsarpugut, tamannalu ajoriinnagassaanngilaq, Cubamut unamminissaq sioqqullugu taannalu pingaaruteqarpoq, Jakob Andreassen oqarpoq.
Assammik arsarluni pissartanngorniunnerit PanAmerikanske mesterskaber Amerikami kujallermi Chile-mi ingerlanneqarput.
