Kalaallit Cubamiunut unammilluarput

Kalaallit angutit assammik arsaallutik nunanut allanut unammisartut Cuba-mut ippassaq unammigamik 25-inik isertitaqarlutik ajorsarput, Cubamiut 32-nik isertitaqarlutik ajugaasut.
Allattoq Jaaku Lyberth
juunip 24-at 2010 07:46

Cubamut unamminerminni kalaallit ajorsarnerat VM-mut Sverige-mi ingerlanneqartussamut anngutinngitsoornerannik kinguneqarpoq.

Kalaallit unammisartuisa ajorsarnermik kingorna Amerikami kujallermi assammik arsaalluni pissartanngorniunnermi Pan Amerikanske Gruppe A-mi inissisimaannarnissaminut unammisussanngortoq, Kalaallit Nunaanni Timersortartut kaffuffiata GHF-ip nittartagaani allapput.

Pissartanngorniunnermi Cubap pissartanngornissaa naatsorsuutigineqarpoq, Cubamiut arsaattartui tamangajammik meterinik marlungajannik angissuseqarput. Cubamiunut ippassaq unamminermi, unamminerup immikkoortuani siullermi Cuba-miut 17-eraarlutik siuaqqapput, kalaallit unammisartui 13-inik isertitaqartut.

Kalaallit assammik arsaattartuini Hans Peter Motzfeldt isertitsinerpaavoq, arfineq marlunnik isertitaqarami. Miki Heilmann aamma Minik Dahl Høeg tamarmik sisamanik isertitaqartut.

Kalaallit unammisartui Den Dominikanske Republikkimut ullumi unammissapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq