Kalaallit Chilemut ajorsarput
Unammineq naligiiffioqisoq Chilemiut ajugaanerannik naggaserneqarpoq panamerikamiut pissartanngorniunneranni unamminermi siullermi kalaallit assammik arsartartut unammimmata.
Ilimagineqareersutut unammineq naligiiffioqaaq muminnermilu tamarmik 14-raarlutik naligiipput. Minutsillu aqqaneq marluinnanngorneranni 25-25-mik naligiiginnarput. Chile mumereernermi siuaqqajuarsimasoq ajugaavoq 31-28-mik.
- Kalaallit målinik arlalinnik kinguaqqalaartuarput angummateqqikkaangatalu Chile målinik arlalinnik siuaqqittarluni, nunanut allanut unammisartut angalaneranni pisortaq Kurt Lauritsen nalunaarpoq.
Minik Dahl Høegh kalaallini arsarluartortaavoq quleriarluni isertitsilluni aammalu Miki Heilmann aamma Miilu Rosing tamarmik tallimaraarlutik.
Chilemiuni Emil Feutzmann isertitsinersaavoq arfineq marloraarluni, siornatigullu Barcelona-mi unammisartoq Marco Antonio Oneto assersuinermi qitiuvoq taamaattorli marloriarluni minutsini marlunni anisitaasoq, aaqqissuisut Argentinamiut assammik arsarnermi kattuffianneersut nalunaarput.
Kalaallit unnugu Argentina unammissavaat taakkulu USA ippassaq 33-13-mik ajugaaffigaat.
Kalaallit isertitsisui tassaapput:
Minik Dahl Høeh 10
Miilu Rosing 5
Miki Heilmann 5
Akutaaneq Kreutzmann 3
Andreas Lorentzen 3
Angutimmarik Kreutzmann 2
Unammineq uani takusinnaavat Argentinamiut assammik arsartartuisa kattuffiat immiussaa:
