Kalaallit chat-erutiliaat unammillerpoq
Maanna kalaallit nunaanniit Snapchatimut unammillertumik saqqummertoqarpoq. Taanna Replymik ateqarpoq, pilersitsisartup Jens Jakob Lennerth-Sandgreenimit pilersinneqarpoq.
- Maannakkut atuisunut siammarternissaa piareerlugu misigaagut, Jens Jakob Lennerth-Sandgreen oqaluttuarpoq.
Reply Iphonenut allaqatigiissinnissamut atortorissaarutaavoq. Kammalaatit allaqatigineqarsinnaapput, assinik nassinneqarsinnaallutik stickersinillu nassiussisaqattaassutaasinnaalluni. Amerikarmiut Snapchatiat assigalugu allaqatigiinnermut atortup allatat kingulliit nungutertarpai.
Reply Kalaallit nunaanneersunik stickersinik imaqarpoq, app-llu app storimi aaneqarsinnaasut assiginagit. Atortorissaarut New Yorkimi pilersinneqarpoq, isumassarsisulli ima nassuiarpaa.
- Allagaq kingulleq nungusarneqartuaannarpoq, allakkamik nutaamik nassitsinnermi. Assersuutigalugu kammalaatillu allaqatigiikkussi, kammalaatippit illillu allatasi kingulliit kisiisa takusinnaavasi, Jens Jakob Lennerth-Sandgreen taama oqarpoq.
Pilersitami inunnit 700-nit aaneqarsimanera taassuma tulluusimaarutigaa, atuisulli nunatsinniit danmarkimiit Amerikamiit Spaniameersuupput. 700-ut akornanni 400-ut ullut tamaasa app-eq atortaraat Jens Jakob Lennerth-Sandgreenip oqaatigaa.