VIDEO ASSILLU: Kalaallit AWG-mut unammiartut tikereerput
Kangerlussuarmi tallimanngornermi ullaap tungaani inuusuttuararpassuit qilanaarlutillu nuannaartut aappalaartunik nasallit aappalaartunillu takisuunik kavaajallit sumi tamani takussaapput.
Nunatsinni sumiiffinnit assigiinngitsunit Kangerlussualiarsimapput Canadami Yellowknifemut nalunaaquttap akunnerini 4,5-mi ingerlaqqittussaallutik.
AAMMA ATUARUK Unammisartut 107-it Canadami AWG-eqarnerani peqataassapput
Qiimalluartut
Air Greenlandip timmisartorsuata atortumigut akornuteqarluni kinguaattoortussanngornera Air Greenlandimit nalunaarutigineqarmat pissangaammertoqaraluartoq unammiat nikalloratik qiimapput.
Erinarsorput, illaqattaarlutik, unammiaqatissatik ilassiortorlugit ilaallu Dene Gamesimi sungiusarput.
Norsarlu ikiartorfigineqarnissaminut piareertoq nalunaarutigineqarmat nuannattunnguaqarpoq hurraartortoqarlunilu.
AAMMA ATUARUK Canadami AWG-mut peqataasussat timmisartuunneqarnissaat Air Greenlandip aningaasaliissuuffigaa
Illoqarfinnut unammiffiusussanut angalaneq sivisooq
Unammiat Yellowknifemut tikinnermik kingorna canadamiut killeqarfimmik nakkutilliisuinit nalunaaquttap akunnerini pingasuni misissorneqareerlutik bussinik biilinillu attartukkanik illoqarfinnut unammiffiusussanut Hay Riverimut Fort Smithimullu ingerlaqqipput.
Ingerlaarnerallu taanna nalunaaquttap akunnerinik 10-11-nik sivisussuseqarpoq, unammiartulli inuusuttut qiimalluarput apuuffissaminnullu ajoratik tikipput.
AWG-p ammaanersiorneqarnera Hay Riverimi aqagu sapaammi pissaaq, taannalu KNR-ikkut toqqaannartumik nalunaaqutaq 23.00-imit isiginnaarneqarsinnaavoq.
AAMMA ATUARUK AWG-mut peqataasussat Bibi Chemnitzimeersunik atisaqassasut