Kalaallit atuartut pingasut Folketingiliarput
Kalaallit Nunaanni meeqqat atuarfiini atuartut angajulliit aningaasarsiaqalertariaqarpoq.
Kangerlussuarmi Qinnguata atuarfiani 10. klassemi atuartut taama siunnersuuteqarput.
Qinnguata atuarfiani atuartut pingasut inuusuttut inatsartui Folktingimi ataasinngorpat ataatsimiilerpata peqataassapput, ataatsimiinnermi inuusuttut allat 175-it ataatsimeeqatigissallugit.
Qinnguata atuarfiani atuartut inatsissatut siunnersuummik ataatsimiititaliamut saqqummiussissapput, ilinniartitaanermut ministerimut apeqquteqassapput, isumaqatigiinniassallutik naggataatigullu inatsisissatut siunnersuummut taaseqataassallutik.
Atuartut inatsisissatut sinnersuuteqarunik Folketingimi suliariaaseq malillugu siunnersuusiussapput, Folketingimi attaveqarnermut suleqataasoq Christian Juul Lenz oqarpoq.
Inuusuttut inatsisartui ukioq allortarlugu katersuuttarput, atuartut namminneq inatsisissanik nutaanik siunnersuusiortarlutik. Inuusuttut inatsisartui katillutik 179-iusartut, taakkunannga 60-it Folketingimi qinikkatut ulloq ataaseq Folketingip ataatsimiitarfiani ataatsimiissapput
Folketingimi ataatsimiinneq naammassilerpat, atuartut inatsisissatut siunnersuutinik aqqaneq marlunnik taasissapput, inatsisissatullu aalajangiunneqartut ilinniartitaanermut ministerimut tunniunneqassapput.
Inuusuttut inatsisartuisa ataatsimiittarnerat pisutut annertuutut folketingimit isigineqarpoq.
Inuusuttut inatsisartui 2009-imi ataatsimiimmata, ministerit qulit folketingimi ilaasortat aqqaneq marluk aammalu folketingip siulittaasoqarfianit siulittaasup tullersortaa aammlu siulittaasumut tullersortit sisamaat ataatsimeeqataapput.
Inuusuttut inatsisartuisa ataatsimiittarnerat ukioq allortarlugu ingerlanneqartarpoq siullerpaamik 1999-imi ataatsimiittoqarluni.
