Kalaallit atuakkiortut Sverigemi atuakkanik saqqummersitsinermi peqataassapput

Oqaluttualiaaqqanik atuakkiaq ukiormanna juunip qaammataani kalaallisut danskisullu saqqummerpoq oqaluttuaaqqanillu inuusuttullu nunatsinneersut oqaluttuaaraliaannik qulinik imaqarluni. Inuusuttut taakku qulit NAPAp, Nunatta Atuagaateqarfiata, NUIF-ip Milik Publishingillu suleqatigiillutik aaqqissugaannik atuakkiornermik unammisitsinermi ajugaasutut toqqagaasimapput.

- Allatta inuusuttut ullumikkut soqutigisaat pillugit inuusuttut oqaluttualiorlutik atuakkiornissaannut soqutiginninnerulersinnissaannik siunertaqarpoq. Oqaluttualiaaqqanik katersat inuusuttut atuarusussuseqarnerinik nukittorsaasinnaanissaa neriuutigaarput, suliniaqatigiiffinnit unammisitsisunit oqaatigineqarpoq.

Inuusuttut atuakkiortut qulit isumassarsiorlutik angalanerminni ilaatigut Københavnimi atuakkiornermik ilinniarfik, Testrup Højskole atuakkialerinermik sammisaqarfiusoq pulaassavaat aammalu Københavnimi Kalaallit Illuutaanni atuffassisoqarneranut peqataassallutik.

Inuusuttut peqataasut tassaapput: Maaliaaraq H. Nielsen, Paninnguaq Boassen, Miiannguaq Olsvig, Johannes-Lars Therkelsen, Pivinnguaq Mørch, Tukummeq Danielsen, Gerda Berthelsen, Sørine Steenholdt, Niviaq Korneliussen aamma Rosine Kreutzmann.

Isumassarsiortitsilluni angalaneq NAPA-mit, Nunat Avannarliit Kulturimut aningaasaateqarfianit aamma Nunani Avannarlerni Kulturikkut attaveqaammit Nordimit aningaasalersugaavoq