Kalaallit atuakkiaat nutaarpassuit atuakkanik saqqummersitsinermi ilisaritinneqarput

- Pissanganaqaaq. Angumersinnanerlutik? Angumersissanerlutik?, naqiterisitsisartoq Inger Hauge eqqissiallassimaqaluni atuakkanik assigiinngitsunik arfineq pingasunik ullumi saqqummersitsinerminut atatillugu oqarpoq.

Atuakkat nutaat ilagaat Kristian Aajup atuakkiaa nutaaq Den tatoverede strandvasker/ Alumiguulik, Frederik Kristensenip, Kunngip, taalliai, Grethe Lennert Poulsenip taalliaminik katersai Nipaassutsip Nipaa/Stilhedens Stemme, atuakkamik saqqummersitseqqaartup Anne Marie Andersenip nammineq misigisanik atuakkiaa, kiisalu minnerunngitsumik Finn Lyngep nammineq misigisanik atuakkiaata immikkoortuata aappaa.

- Taanna naatsorsuuteqarfigisupilussuuara, amerlaqisut apersuutigisarmassuk. Immikkoortormi siulleq oqaluttuassaqartarfiusumi naavoq, oqaluttuallu sinnera maanna oqaluttuarineqarluni. Uanga nalilissagukku immikkoortut aappaat immikkoortumit siullermik pitsaanerujussuuvoq, Inger Hauge oqarpoq. 

Milik Puslishing aamma Bogforumimi atuakkanik saqqummersitsivoq. Naqiterisitsisartup Lene Therkildsenip saqqummersitaa kingulleq tassaavoq atuagaq  oqaluttualiornermik unammisitsinermi Allattami oqaluttualiaaqqanik ajugaassutaasunik qulinik imaqartoq, taassuma aamma atuakkiortut inuusuttut arlallit suleqatiginiarpai.

- Oqaluttualiaaqqat ilaat periarfissaqarluarput, aamma atuakkiortut arlallit saqqummersitsissamaarput, imaassinnaavoq ilaat iluatsitsilluartoq - aamma unatta avataani.

Milik Publishingip aamma Juaaka Lyberthip atuakkiaqqaataa danskisuunngorlugu nutsertippaa kiisalu aamma Jette Bangip anguteqatinoortut arnaqatinoortullu pillugit assilisanik atuakkiaanik atuakkanillu meerarsiutinik arlalinnik saqqummersitsissamaarluni.

Bogforum 22-issaannik ingerlanneqarpoq, atuakkanillu naqiterisitsisarfik Atuagkat 21-eriarluni peqataasimavoq Milik Publishing ilisimaneqartutut suli nutaraalluni.