Kalaallit atisanik ilusilersuisartut ullutsinni nunani allamiunit soqutigineqaleraluttuinnarput

Qallunaat atisanik mutinik ukiumoortumik takutitsisarnerat ullumi aallartippoq, tassanilu kalaallit arlallit peqataapput.

Nunani allani ataatsikkut peqataasut arlaqarput - soorlu panigiit Isaksenikkut. Siorna suliffeqarfiutaat tyskit sullissiviannik Düsseldorfimeersumik isumaqatigiissuteqarpoq, sapaatip akunnerani uani tyskit atisanik takutitsineranni taakku sinnerlugit takutitsisut, Nickie Isaksen unnersiorpoq.

- Isaksenikkut sinnerlugit suleqataat Hamborgimi takutitsinermi najuupput, taamaalillutillu ilusilersugaat qallunaanut takuniaasunut ersarinnerulersillugit, kisianni aamma nunani allamiunut, tamakku Københavnimiit, Hamborgimiit allaniillu aggersuupput.

Kalaallimmi atisanik ilusilersugaannut mutinut soqutiginninneq nunani allani annertusingaluttuinnarpoq. Tamanna tuniniaanerni takoqqusaartitsinernilu malugisarpaat:

Nunanit allanit takuniaasut qanittumiit ungasissumiillu tassaasinnaapput soorlu Canadamiit Japanimiillu - sanaatsinnut isumassarsiorfigisartakkatsinnullu soqutiginnittaqaat. Nunani allani maannakkut Kalaallit Nunaanni pisut soqutigineqartupilussuupput. Amerlasuutigummi nutaaliaasorujussuupput, atisanillu ilusilersuinermut atatillugu amerlapput kulturikkut kigorngussat tunngavigalugit isumassarsiortarnermik siornatigut takusimanngitsut. Tamannalu assorsuaq soqutigineqarpoq. Kalaallit ilusilersueriaasaat alutorineqartupilussuuvoq.

- Nutaaliornerup tungaatigut assigiingitsorujussuarmik sunniussinnaaneq tiguneqartarpoq, apequtaalluni canadamiu, tuluk japaniuluunniit oqaloqatigigaanni. Ingammik Japan arlaatigut tigusilluartartorujussuuvoq. Isumaqarpunga atisalioriaasaasa oqaluttuassartaannut tunngassuteqartoq, aammalu kulturiannut.

Aammattaaq kalaallip atisanik ilusilersuisartup Bibi Chemnitzip niuveriaatsini naalagaaffeqatigiinnerup avataanut annertusisimavaa. Parisimi angutinut atisalianik sapaatip akunneqartitsinermi peqataareerluni ippassaq Københavnimi mutinik atisalianik takutitsinermut peqataajartorluni tikippoq.

- Kalaallit Nunaanni Danmarkimilu pisisartugut nuannareqaagut, nunanili allani niuverfissarpassuupput, nuanneqaarlu neqeroorutigisinnaasagut nittarsaassinnaallugit.

Atisaliaani kalaaliussuseq malunnartinneqartuaannanngilaq. Kisianni malugisarpaa Nunatsinnit kingoqqisuunini saqqummeraangat soqutiginninneq annertusisartoq.

- Kalaallit Nunaat nittarsaatissallugu tanngassimaarutigaara, amerlanngillammi Kalaallit Nunaata sumiinneranik ilisimannittut. Aperippatalu Kalaallit Nunaat sumiippa? Nassuiaassisariaqartarpugut, nunarujussuusoq qanorlu uagut ikitsiginerluta.
Bibi Chemnitz Københavnimi pisiniarfiummi saniatigut - nunani allani nittartakkat angisuut aqqutigalugit aamma tuniniaasarpoq. Københavnimi atisanik nittarsaassineq sapaatip akunnera naallugu ingerlanneqassaaq.