Kalaallit atisanik ilusilersuisartut inuusuttunut ilusilersuerusupput
Isaksen Designip, Great Greenlandip, Bibi Chemnitzip aamma Helene Steensbyp Bella Centerimi atisanik saqqummersitsinermi CIFF-imi nutaanik pisiniartartoqalernissartik tamarmiullutik sulissutigaat.
Atisanik ilusilersuisartoq ingerlalluartoq Bibi Chemnitz suleqataalu David Røgild sapaatit-akunnerani atisanik saqqummersitsinermi immikkut takutitsisoqarnerani ukiut pingajussaanik atisaliaminnik nittarsaassinissaminnut periarfissinneqarsimapput. Tamannalu Københavnip Rådhusiani aqagu pissaaq. Taamaammat saqqummersitsivianni ulapputtunnguaqarpoq.
- Aaqqissuussineq taama angitigisoq peqataaffigalugu nuanneqaaq. Takutitsinissami suleqataasugut 70-iuvugut, taamaammat naammassiniarluta ulapeqaagut. Nunarsuarmit tamarmit tusagassiortunik pisiniartartunillu takkuttoqartussaavoq, Bibi Chemnitz oqarpoq.
Atisanik ilusilersuisartut Kalaallit Nunaata pinngortitaanik assilisaq internettimi nalaatsornerinnakkut nassaarisimasartik isumassarsiorfigalugu aapaagu ukiornissaanut ukiorsiutissanik ilusilersuisimapput.
- Asseq torrattupilussuuvoq – qaqqani assilisaavoq pinngortitallu qalipaatai kusanartupilussuullutik, taakkorpiaallu isumassarsiorfigalugit atisaliavut tamaasa qalipaasersorpagut, Bibi Chemnitz oqarpoq.
Helene Steensby 2010-mi suliffeqarfimmi akiliisinnaajunnaarnerata kingorna skuunik sanaartornini aatsaat aallartillualersimaavaa. Skuuliai suliffeqarfik ikinngutimi Christel Aistrupip pigisaa aqqutigalugu tuniniarneqarput.
- Allaanerusumik eqaarsarluta inuusuttuunerusoq kamippaliorniarluta toqqarsimavarput. Puisit amiisa atornissaat suli pingaartittupilussuuarput, Helene Steensby oqarpoq.
Isaksen Designip aamma inuusunnerusunut tuniniaaniarluni toqqarsimavaa. Nickie Isaksenip saniatigooralugu suliani Kalak unitsillugu Isaksenimi ilusilersueriaaseq pimoorullugu aallutilersimavaa.
- Atisanik tamatigoortupilussuarnik suliaqarniarluta toqqarsimavarput, aamma inuusunnerusunut tulluunnerusunik - akikinnerusunillu - suliaqarniarluta toqqarsimavarput. Soorunami atisaliavut ilisarnartut suli nassaassaapput, siammasinnerusumilli allaanerusumillu atisaliorniarluta aalajangerpugut, nassuiaavoq.
Great Greenland saqqummersitsinermi kisiartaalluni nutaanik takutitassaqanngilaq. Siornatigulli saqqummersinneqartarsimasut nuannarineqarluartut katersorlugit saqqummersippaat, tuniniaanermilu pisortap pisiniartartut nunanit allaneersut sopqutiginnilersinniarlugit tamaviaarpoq.
- Nunat ilaat puisit amiinik nalinginnaasumik piumasarput: Norge, Finland, Rusland, Estland, Letland, Litauen, aamma Nunanut allanut misteriaqarfiup Helsinkimi allaffeqarfiani pisortap tuniniaanitsinni ikiuinissaanik isumaqatigiissuteqarfigaara, Bente Nørkjær Knap oqarpoq.
Great Greenland nutaatut annoraaminernik, kiatinik, toppinik assingisaanillu puisit amiinik ilusilersukkanut tulluuttunik aamma suliaqartitsisimavoq.
