Kalaallit atisaliaat Berlinimi
Kalaallit atisaliaminnik saqqummersitsisussat, Savalimmiorsmiut Islandimiullu peqataasussat ataatsimoorlutik saqqummersitsissapput.
Inuik Design, ineriartornissaanut Inatsisartut aningaasaliissuteqarsimapput. Maannalu Najannguaq Davidsen Lennert siullermeerluni taama takutitsinissami angisuumi peqataassaaq. Pernarlunilu atisalianik takutitsinissaq ilinniarfiullunilu misilittagaqarfiussaaq.
-Mikisoq H. Lynge Inuik Designimi niuerniarnermi aqutsisora peqatigalugu Berlinimiippunga. Nunanilu avannarlerni suleqatigut peqatigalugit atisaliagut saqqummersissallutigit. Nipilersuutilerluni qitinnermik takutitsinermi atisaliagut saqqummersinniarpagut. Maanilu peqataanerput ilinniarfigalugulu pissarsiaqarfigissaqaarput,Najannguaq Davidsen Lennert oqaluttuarpoq.
Atisat saqqummersinneqartussat suliarilluagaapput, atisanillu ilusilersuisup nunami angerlarsimaffiani suliaallutik.
-Atisat ilusilersornerini titartakkat, mersorneqarnerilu Nuummi suliarineqarput. Atisat saqqummersinneqartussat qanga Inuit atisatoqaannik nunanilumi avannarlerni atisarineqartut isumassarsiorfigalugit suliaapput. Maannalu atisat saqqummersinneqartussat tigulluarneqarnissaat neriuutigiinnaleqaavara, Najannguaq Davidsen Lennert oqarpoq.
Sisamanngorneq Bureauet BOLD-ip aaqqissuussaanik atisalianik nioqquteqartoqarlunilu Tusagassiortunik nunanit tamaneersunik katersuutitsisoqassaaq.
Atisaliat Inuik Designenimeersut saqqummersitassat ilaat uani takusinnaavatit: www.inuik.net