Kalaallit atisai nittartakkami takuneqarsinnaanngorput
Kalaallit angutit arnallu atisaat assigiinngitsut 39-it Kalaallit Nunaat tamakkerlugu katersorneqarsimasut massakkut Sisimiut Katersugaasiviata nittartagaani www.dragter.gl –imi qimerloorneqarsinnaanngorput. Piumaguit qarasaasiakkut kalaallisut atisat tunuaniit saavaniit saneraaniillu takusinnaavatit.
- Assiliilluni suliaqarnermi atisat ukua kusanarluinnartut Kalaallit Nunaanni qitiusumik kulturikkut oqaluttuarisaanermi pingaaruteqartut tamanut ammasumik Kalaallit Nunaanni katersugaasivimmiinnaanngitsoq tamanulli soqutiginnittunut aamma Kalaallit Nunaata killeqarfiisa qaangerlurussuarlugit takuneqarsinnaanngorput, Sisimiut Katersugaasiviani pisortaq Ólafur Rafnar Ólafsson nassuiaavoq.
Nunatsinni katersugaasivinni qulingiluaniit atisat taakku katersorneqarnikuupput. Nunarput tamakkerlugu Tunumiit, Kujataanut, Kitaani Avannaanilu assuutit atisallu kalaallit sanaarisimasaat takuneqarsinnaapput. Sumiiffinni assigiinngitsuni atisaliortariaatsit assigiinngitsut tassani takutinneqarput.
Nittartakkami atisat takuneqarsinnaasut assiliisartup Roberto Fortunap assilisarai, taanna Nationalsmuseets Bevaringsafdeling-imeersuuvoq. Nittartakkami atisat tamarmik assiliivimmik nutaaliaanerpaamik atuilluni 24-eriarlugit assilineqarsimapput, taamaalillutik atisat saavi tunuatungai saneraallu tamarmik nittartakkami assini takuneqarsinnaalerlutik.
Nittartagaq kalaallit atisaanik nittarsaassisoq kingusinnerusukkut Danmarkimi ilisimatuussutsikkut suliami ’Nordlige Verdener’-imi Nationalmuseet ataaniittumi takuneqarsinnaalissapput.
