Kalaallit assammik arsartartut U-20-t nukappissat VM-imut peqataalerput

Kalaallit U-20-t assammik arsartartut nunanut allanut unammisartut aasaru VM-imi peqataassapput.

Tamanna qularnarunnaarpoq Mexicop peqataasinnaanani nalunaarnerata kingorna, tamannalu Kalaallit Nunaannut inissaqalersitsivoq.

Timersoqatigiiffiit Assammik Arsartartut Kattuffiat tusagassiorfinnut nalunaarummi taama allappoq.

Kalaallit nunanut allanut unammisartut Mexicomi decemberip qaammataani anngunniunnermi anngutinngitsooraluarput. Mexicoli peqataasinnaajunnaarmat Kalaallit Nunaat annguppoq.

TAAK-p oqaatigaa U-20-nut sungiusaasut peqatigalugit VM-imut peqataanissamut angersimallutik.

- Periarfissaq siunissaq ungasinnerusoq eqqarsaatigalugu sungiusaasoqatigiinniik iluaqutaasinnaaneranik siunertalimmik nuannaarutigalugu atorluarusupparput. Arsartut ineriartortinnissaat pisinnaasatigut nunallu tamalaat unammiuaarnerini misigisaqartinnissaat ilinniutissatut piumassusermillu tunisisussatut kinguneqarnissaanik neriuuteqarluta, nunanut allanut unammisartunut sungiusaasut Muusaarannguaq Ostermann-Søholm aamma Angutimmarik Kreutzmann taama oqarput.

Kalaallit 2009-mi kingullermik peqataapput

Nukappissat angajulliit nunarsuarmi pissartanngorniuunnissamut peqataanissaannut aningaasaliisinnaasunik ujartuilluni massakkut ulapputigineqartoq TAAK-p nalunaarutigaa.

- Periarfissaq taama angitigisoq aamma angutit inersimasut nunanut allanut unammisartut siunissami kinguaariit nikinnissaannut piareersaataalluartutut isigaarput, aamma qanoq kinguneqarluarsinnaasoq misilittagaqarfigaarput. Tassami kingullermik inuusuttut angajulliit VM-imut peqataammata 2009-imi Igitsinimi ullumikkut angutini inersimasuni nunanut allanut unammisartuusut pingaarutillit amerlanersai 2009-imi inuusuttuni VM-imi peqataasimapput, kattuffik taama nalunaaruteqarpoq.

Nunarsuarmi pissartanngorniunneq juunip 20-ni Athenimi Grækenlandimi aallartissaaq, Tysklandimilu juulip pingajuani 2023-mi naammassissalluni.

Kalaallit Gruppe F-mi inissipput, ukulu nunat peqatigalugit: Sverige, Slovenien aamma Bahrain.