KAK illup iluani arsaannermik pissartanngorniuttoqarnissaanik sulissuteqartoq

Illup iluani, tassa futsalimik qaammat ataaseq qaangiuppat pissartanngorniuttoqarsinnaanngorunarpoq.

Kalaallit Arsaattartut Kattuffiatami, KAK-p, futsalimik ataasinngorneq marsip ulluisa 22-anniit apriilip qeqqata tungaanut pissartanngorniuttoqarnissaanut aaqqissuussileruttorpoq.

Naalakkersuisut nunatsinni kommunit akornanni angalanermut aaqqissuussanilu peqataanermut apriilip ulluisa 18-iata tungaanut atuuttunik killilersuinernik qasukkaareersullu taamaaliorsinnaanngorput.

AAMMA ATUARUK Nunatsinnut angalasoqarnissaanut killilersuinerit apriilip 18-ianut sivitsorneqartut

KAK-p Naalakkersuisut nersualaarpai.

- Kalaallit Arsaattartut Kattuffianiit nuannaarutingaarput kommunit akimorlugit aaqqissuussisinnaanermut malittarisassat qasukkartinneqarmata, tamannalu tungitsinniit Naalakkersuisut nersualaarusuppagut taamatut qasukkaanerannut, KAK tusagassiuutinut nalunaarpoq.

KAK ulluni tulliuttuni nalunaaruteqassasoq

Nukappiaqqat niviarsiaqqallu U15-it niviarsiaqqallu U18-it pissartanngorniunnerat eqqaassanngikkaanni, futsalimik siorna pissartanngorniuttoqanngilaq.

Tassa imaappoq, siorna marsimi apriilimilu pissartanngorniunnissaraluit taamaatinneqartut pisinnaanngorput.

KAK-p nunatsinni isikkamik arsaattartut peqatigiiffii pissartanngorniunnermik aaqqissuusserusuttortaqarnersut misissuleruttorpaa.

- Pilersaarutit imatut isikkoqarput, illoqarfiit aaqqissuiffiusussat qulakkeeqqaassavagut ilumut aaqqissuerusuttoqarnersoq, taakkulu ulluni tulliuttuni nalunaarutigissavagut, KAK allappoq.

AAMMA ATUARUK Coronamut malittarisassat qasukkarmata: Volleyball GM-mut piareerpoq

U-15-it sapaatit akunnera 12-imi, tassa ataasinngorneq marsip ulluisa 22-anniit pissartanngorniutissasut, KAK-p naatsorsuutigaa.

U-18-it sapaatit akunnera 13-imi, tassa ataasinngorneq marsip ulluisa 29-anniit.

Arnat sapaatit akunnera 14-imi, tassa ataasinngorneq apriilip ulluisa tallimaanniit.

Angutillu sapaatit akunnera 14-imi, tassa ataasinngorneq apriilip ulluisa aqqaneq-aappaanniit.

Angutilli pissartanngorniutinnginnerminni sapaatit akunnera 11-imiit sapaatit akunnera 13 ilanngullugu anngunniutissapput.

Pissartanngorniunnermik aaqqissuussinermut piumasaqaatit

Naalakkersuisut nunatsinnut angalanermut killilersuineq apriilip ulluisa 18-iannut sivitsorpaat. Tassa imaappoq, oqartussanit akuerineqarsimasut kisimik, tassa inuit corona pillugu allattoqarfimmit akuerineqarsimasut kisimik, nunatsinnut isersinnaapput.

Naalakkersuisummi coronavirusi ingammik coronavirusit ilaat Tuluit Nunaanneersoq Danmarkimilu tuniluutileruttortoq nunatsinni siaruatsaalerusullugu taamaaliorput. Coronavirusit ilaat Tuluit Nunaanneersoq coronavirusimit tuniluutileqqaartumit tuniluutianeruvoq.

Corona pillugu killilersuinernik qasukkaaneq killilimmik piffissaligaasoq, Naalakkersuisut oqarput.

Tassa imaappoq, Naalakkersuisut nunatsinnut angalaneq apriilip ulluisa 18-iata kingorna ammaqqikkunikku killilersueqqilissapput. Naalakkersuisulli qanoq sukannertigisumik killilersuinissartik apriilip ulluisa 18-iata qallinerani aatsaat aalajangerniarpaat.

Nunatsinni pissartanngorniutsitsinermut piumasaqaatit tallimaapput:

Illoqarfinni ukunaniinnaq aaqqissuussisoqarsinnaavoq: 

• Ilulissat, Aasiaat, Qasiannguit, Qeqertarsuaq, Kangerlussuaq, Maniitsoq, Sisimiut, Nuuk, Paamiut, Narsaq, Narsarsuaq aamma Qaqortoq. 
• Aaqqissuussisoqarnissaanut ullut 30-t sioqqullugit illoqarfimmi aaqqissuussiffiusussami tunillatsissimasumik uppernarsaasoqarsimassanngilaq.
• Aaqqissuussineq 50-init amerlanerusunit peqataaffiussappat tamanna Nakorsaaneqarfimmit akuerineqaqqaassaaq. Isiginnaartussat naatsorsorneqartunut ilaassapput.
• Tamatuma saniatigut aaqqissuussisoqarnissaanut ullut 14-it kingulliit iluanni tikittut peqataqqusaanngillat. Inuit ullut 14-it kingulliit iluanni tikittumut qanillisimasut aamma peqataaqqusaanngillat.
• Illoqarfimmi aaqqissuuffiusumi tunillatsissimasumik naammattuuisoqarpat aaqqissuussinermut peqataasut namminneq kommunerisaminnut aallartinnatik coronamik tunillatsissimannginnermut uppernarsarneqaqqaassapput.