Kalaallit arsaattartut Tysklandimut unammersuariassapput
Kalaallit isikkamik arsarnermik nunanut allanut unammisartui maaji naalerpat Tysklandimukassapput. Nunarsuarmi arsaattartut kakkannersaattut unammersuarnermut peqataanngikkaluarlutik nunat minnerit arsaannermik unammiuaarnerannut peqataassallutik. Kalaallit Nutaata nunat kiattut takornariaqarfiulluartartullu Gibraltar Zanzibarilu sukkut assigiissuteqarfigigamigit. Tassa arsaattartut kattuffissuanut FIFA-mut ilaasortaannginnamik nunarsuarmilu pissartanngorniunnissanut aasaru ingerlanneqartussanut peqataasinnaannginnamik. Danmarki nunarsuarmi pissartanngorniunnissamut anngutinngitsoortoq tusareerparput, qanorliuna ililluni Kalaallit Nunaat arsaannernut peqataasinnaalersoq.
Kalaallit Nunaannit Arsaattartut Kattuffianni siulittaasoq Lars Lundblad ima oqarpoq.
-Siullermik oqaatigissavara tassa ukiut marlussuit matuma siornatigut isumaqatigiissutigigatsigu FIFA-p ataani nunat mikisut soorlu Kalaallit Nunaat, Gibraltar allallu immikkoortuliorneqarsinnaaneq. Pilersaarusiorsimavarput Gibraltarimi aaqqeriarnikuugaluaratsigu kisianni maannakkut sponsorit allallu peqatigalugit hamborgimi ingerlanneqartussanngorpoq, iluatsillugulu tassani unammeqattaarnerit ingerlanneqassallutik. Lars Lundblad oqarpoq.
Kalaallit nunanut allanut isikkamik arsarlutik unammisartui Tysklandimukarunik Hamborgimi, Gibraltarip Zanzibarillu saniatigut Tibet aamma tyskit F.C. St. Pauli (hjemmebanertussat) unammisinnaassavaat.
-Sungiusaasup Jens Tangip arsartussat toqqartoreerpai maannakkullu taakkua bilitsissaat isumagineqalerput aamma una piareersarnerput maannakkut nukingikuluttumik pigami aatsaat ippassaani apriili naalersoq paasigatsigu taanna piviusunngortussanngortoq, tassa sponsorit allallu suleqataanerat tassani iluatsinnerat pissutaavoq.
Lars Lundblad Thomas Gruemit apersorneqarluni taama oqarpoq. FIFA-p ataani nunat minnernik taaneqarsinnaasut immikkoortortaqalernissaat suliniutigalugu nanginneqassaaq. Unammisaqattaarnerillu maajip 29-ianit juunip ulluisa pingajuannut ingerlanneqassapput.
