Kalaallit arsaannermi nunat tamalaat unammineranni peqataalersut

Kalaallit nuna tamakkerlugu sungiusaasuat Morten Rutkjær Nuummi sapaatip akunnera kingulleq sivikitsumik sungiusaqatigiissitsivoq. Arsaattartut qasujaassutsikkut misilittarneqareersut unammiartortussat 22-t toqqarneqarput.

Unammineq peqataaffigisassaat taaguuteqarpoq Conifa Euro 2026 Insubria Europap kujataani nunat immikkoortui kalaallit ilanngullugit arfiniliusut peqataaffigisassaat. Taakku assigiissutigivaat nunat tamalaat kattuffissuini namminersortutut ilaasortanngorusukkamik taamalu nunat tamalaat unammisarnerini anngunniunnernut peqataasinnaaneq angullugu.

- Pokalinnanniutissaagut. Oqartoqarsinnaavoq nunat peqataasussat arfiniliusut Europami pissartanngorniutilersut, nuna tamakkerlugu sungiusaasoq Morten Rutkjær KNR-imut oqarpoq.

- Una kalaallinut periarfissatsialaavoq sungiussiniarfissatut aammalu pinnataassaq pillugu unamminissamut. Assorsuaq qilanaarpugut unami tassaagunarpoq unammisaqattaarnerit kalaallit peqataaffigisimasaasa annersaat, Morten Rutkjær oqarpoq.

Unammisat pikkorissut

Unammineq aallartillugu dommerip siggarneraniit kalaallit arsaattartut tamaviaartitaassapput.

- Iligiit unammisassavut ataatsit isiginnaareerpakka. Arsartui Italiami pissartanngorniunnermi pikkorinnerit pingajuini sisamaannilu unammisartuupput. Tamaviaartitassaagut unammisassavut ukioq kaajallallugu unammisartuummata, Morten Rutkjær oqarpoq.

Illup iluani arsaattarneq futsal qanittukkut aatsaat naammassivoq. Kalaallit unammisartut silami arsaattarneq maanna sungiunniaqqilerpaat.

- Taamaattumiguna pingaaruteqartoq qulisanik airdomesimik taaguutilinnik silami arsaaffeqalernissaq sungiusarneq sivisunerusumik ingerlasarniassammat, Morten Rutkjær oqarpoq.

Unammersuarnermik aaqqissuisut suleqatigalugit KNR-TV-imi kalaallit unamminerisa takutinneqarsinnaanissaat sulissutigineqarpoq. Unamminerit juunip aallaqqaataani aallartissapput.