Kalaallit arnat sermersuarmik itiviisut apuupput
Nunatta oqaluttuarsisaanerani nuannaarutissatsinnik ippassaq ullumilumi pisoqarpoq, tassa arnat kalaallit sisamat, Najannguaq L. Sværd, Andrie Sørensen, Naja O. Lennert aamma Amma Kleist Knudsen sermersuarmik itiviimmata.
Kalaallit arnat sermersuarmik itiviisut tamarmik ajoratik Tunumi Isortumut ippassaq unnukkut arfineq-pingasunngulersoq apuupput. Piniartunut Isortormiunut qimussimik parsiaasunut ilaallutik Isortumut apuukkamik assut tikilluaqqusaasimallutik Andrie Sørensen oqarpoq:
- Siullermik qujarusuppugut kalaaleqatitsinnut tapersersuisorpassuarnut, ilaquttanut kammalaatinut taamannak malinnaaffigineqarluarluta pigatta, assorsuaq nuannaarutigaarput, tamanna ingerlaarnitsinni nukittoqutigisaqaarput.
Arnat Kangerlussuarmiit apriilip 27-ianni aallartut Tunumi Isortumut ippassaq maajip 29-ianni unnukkut arfineq-pingasut missaanni apuupput. Arnat apuukkiartornerminni tamaviaartaqarsimallutik Andrie Sørensen oqaluttuarpoq.
-Ippassaani aallaratta akunnerni arfineq-pingasuni ingerlaareerluta unikkatta, DMI-mut sianeratta paasivarput silarlulertussaasoq siallilerlunilu, qaffasinnerusumilu nittaallertarluni anorip 25 knobi angusassagaa.
Taamaariarmat aalajangeratta unnuaqeqqanut pikersariarluta kissartunik unnaasinnarluata allaqqippugut, taavalu ingerlaaginnaavilluta qaatilluta ullaassap tungaanut ingerlaarpugut, aatsaallu marluk pingasut missaanni qimussersut marluk parsiaasut - Saalu Larsilu - naapillugit, qujanartumik. Sunaaffami silarlulernissaanut piffissaq kingullerpaaq atorlugu angumersiniaasut.
Arnat Isortumut pisut tikilluaqquneqarsimaqaat.
-Aappalaartulisarlutik inuppassuit nilliasut allagartarsualisaartut, nuanneqaaq. Atuartut pajuppaatigut colassatsinnik mamartukujuit, unnukkullu katersortarfimmi kaffillerlutik, aammalu Saalukkunni puisituuppugut assullu mamarsarluta, Andrie Sørensen unnersiorpoq.
-Nuannisaqaagut ajunngeqaagut ilakka Najakkut Najannguarlu taqqama sinngusarput, Ammartarput aana aatsaat makippoq.
Arnat apriilip 27-iani kitaaniit Kangerlussuarmit aallaramik ullut 32-it atorlugit sermersuarmik itiviipput. Arnat Isortumit ullumi imaluunniit aqagu Tasiilamut ingerlaqqissapput, tassanngaanniillu kitaanut ingerlaqissallutik.
