Kalaallit arnartaat pitsaanerit sisamaattut inissittut
Bronzennanniunnermi ippassaq USA-mut kalaallit unammipput, 27-23-millu inerneqarluni kalaallit ajorsarlutik.
Unamminerup affaani siullermi aallartilluaraluaqalutik muminnermi 14-10-mik kalaallit siuaqqasimagaluarput. Unamminerullu affaata tulliani kalaallit arsartartuinut ingerlanerliorsimaqaat, taamaalilluni USA-p unamminerup affaata tullia 17-9-mik ajugaaffigaat - unamminerlu 27-23-mik inerneqarluni.
Nunanut allanut sungiusaasup ikiortaa Johannes Grothip unamminerup affaani siullermi arsartut takutitsinerat naammagisimaarpaa, unamminerullu affaata tulliani amerikamiut kalaallit arsartuat qeqqaniittoq Najaaja Lyberth tikillugu paarilernerat, saassussinermilu måleriarnerit amerlavallaat iluatsinneqanngimmata ingerlanerliutaasimasut, Johannes Grothip oqaatigaa.
- Arnat peqataanerat assut ilinniarfiusimaqaaq, pitsaanerillu sisamaanni inissinnerput iluarisimaarparput, Johannes Groth oqarpoq.
Aamma atuaruk Arnat assammik arsartartut Puerto Ricomi ingerlaqqipput
Aningaasaliisussamik neriuuteqartoq
Taamaattumik maanna taassuma neriuutigaa, Kalaallit Nunaanni assammik arsartartut kattuffiata unammisartuutinut aningaasaliisussamik nassaarnissaa, amerikap nunavittaani unammersuarnissat Havanami Cubami maajip 20-anit 28-anut pisussat sioqqullugit arnat nunanut allanut unammisartut pitsaanerpaamik piareersarnissaat anguniarlugu.
Puerto Ricomi anngunniunnermi Cubameersut ajugaasuupput, unamminerup kingullersaanni Mexicomiunut 34-25-mik ajugaammata.