Kalaallit arnartaat meeqqiornerpaanut tulliupput
Kalaallit arnartaani arnaq ataaseq agguaqatigiissillugu 2,3-nik meerartaartarpoq, tamannalu taamaallaat Savalimmiormiut arnartaannit qaangerneqarpoq, taakkumi agguaqatigiissillugu 2,5-inik meerartaartarmata.
Nunani Avannarlerni danskit Finlandimiullu arnartaat ikinnerpaanik merartaartarput, tassa agguaqatigiissillugu 1,8-nik meerartaartaramik.
Kalaallini meeqqanut ateritinneqakulanerpaapput Malik aamma Pipaluk, Savalimmiormiunilu ateritinneqakulanerpaat tassaapput Markus aamma Anna.
Nunatsinni naartuersittartut Nunanut Avannarlernut sanilliullugit aamma amerlanerungaatsiarput.
Nordisk Statistisk Årbogip imarai Nunat Avannarliit tallimaasut kiisalu nunat Namminersornerullutik Oqartussaqarfiusut, tassa Savalimmiut, Kalaallit Nunaata, Ålandillu akornanni kisitsisit sanilliunneqarsinnaasut.
Nittartakkami www.norden.org –imi kisitsisit tamakkerlugit takuneqarsinnaapput aamma tassani Nordisk Statistisk Årbog pdf-inngorlugu pissarsiarineqarsinnaavoq.
