Kalaallit arnartaat Chilemiunut ajorsaqqalaarput

Kalaallit unammivaat Chile, taakku 24-raarlutik ajugaapput, kalaallit 22-raartut, kalaallit muminnermi 13-11-mik siuaqqagaluarlutik.

- Unammisut arsarluaraluaqaat, Kalaallit Nunaat sinnerlugu unamminerit aallartilluarnissaasa periarfissinnissaat piareersimaffigalugu, aallartinnerliulaariarlutilli ajuunnernik marlunnik kinguarput.

- Unammisulli ajuutsitsinaveersaarlualeraluarput. Akeqqaminnit arsap tigunissaanut periarfissarsilluaraluarput, unamminerlu Kalaallit Nunaanneersut matusinnaagaluarpaat, arfinileriarlutilli misiliigaluaramik iluatsitsinngitsoorput. Unillatsiarnermi Kalaallit Nunaanneersut 13-11-mik siuaqqagaluarput, Kalaallit Nunaanni assammik arsartartut Kattuffianni tusagassiisartut pisortaat, Carl Johan Colberg, oqarpoq.

Unammineq aallarteqqimmat kalaallit ajuunnernik sisamanik siuaraluarput, unamminerup naammassinissaanut minutsit qulit sioqqullugit siuaqqallutik. Unamminerullu naamamssinissaanut minutsit quliinnanngormata Chile isertitsimmat tamarmik 20-raarlutik naligiilerput.

- Unammineq naammassiartulermat kalaallit iluatsitsinngitsoorput, tassa 22-raaramik chilimiut 24-raartut. Taama inerneqarnerata kingunerissavaa nivissat unamminerni sinneruttuni ilungersortariaqarnissaat, Carl Johan Colberg naggasiivoq.

Nivissat Nunatsinneersut Brasilia ullumikkut unammissavaat.