Kalaallit arlariit Nykøbing Falster Håndboldimi misiliilerput
Nykøbing Falster Håndboldip kalaallinik arsartunik pissarserusunneranik KNR-mi nutaarsiassaq apriilip qeqqani saqqummiunneqartoq arsartut klubbillu akornanni pileritsatsitsilluarpoq.
- Arsartut arlallit namminneerlutik attavigivaannga ilaallu nammineq uanga attavisarlugit. Maanna qularnaatsumik oqaatigisinnaalerparput arsartut arlariit Nykøbing Falster Håndboldimut nuunnissaat qularnarunnaartoq, Johannes Groth suliniummi Nunatsinni ataqatigiissaarisoq oqarpoq.
AAMMA ATUARUK Nykøbing Falster Håndbold kalaallinik amerlanerusunik piumavoq
Suliaq aallartippoq Nykøbing Falster Håndbold arnani U-19-ni ligami unittooqqajaalermat arsartut arlallit aasamut allamut nuuttussanngormata. Maanna ajornartuuleraluarneq Nunatta Danmarkillu akornanni suleqatigiinnikkut qaangerneqalinnguatsiarpoq.
Piumasaqaatit ersarissut
Nunatta Danmarkillu akornanni suleqatigiinnissamut aqqutissiuussisoq tassaavoq Jakob Larsen Nykøbing Falster Håndboldimi inersimasuni ligami sungiuaasoq aamma siornatigut akissarsiutigalugu Danmarkini nunanilu allani unammisartuusoq. Ilinniartoqarfiit aamma peqataalerput.
- Inuussutissarsiutitigut ilinniarneqarsinnaasut assigiinngitsut 25-it kalaallinut qinnuteqarniartunut neqeroorutigisinnaavagut. Taamatuttaaq niuernermi ilinniartuunngorniarnermilu aallartittoqarsinnaavoq, ilinniartoqarfissuarmi CELF-mi pisortaq Søren Vikkelsø KNR-mut ilisimatitsivoq.
CELF-mi siunnersorti Claus Westerholt Nykøbing Falsterimi attaveqaataavoq.
- Kalaallinut maani assammik arsartalerusuttunut pingaartorujussuuvoq ilisimassallugu assammik arsarnermut taamatut qaffasissusilimmut piumassuseqarnissaq aammalu klubbimiit piumasaqaataasunut malinnaasinnaanissaq. Kalaaleq ligami inersimasuni unammisartoq Lykke Frank Hansen tulaavittut atorneqartussaavoq. Tikerlaanut ilinniartoqarfimmiit aamma ikorfartuinissamut piareersimavugut, Claus Westerholt oqarpoq.
Johannes Grothip unammisartut arlallit oqaloqatigisarpai piumasaqaataasunillu nassuiaallugit.
- Nykøbing Falsterimut nuuttussanngortut assammik arsallaqqissuupput. Suleqatigiinnermut tamanna aallarniutaalluassaaq. Inersimasuni unammisartunngoreersut aamma periarfissinneqassapput. Tassami ligami unammisartut saniatigut 3. divisionimi aamma unammisartoqartoqarpoq kalaallit ilannguffigisinnaasaannik, Johannes Groth oqarpoq, nuuttussanngortulli atiinik maanna saqqummiussisinnaannginnerarpoq.