Kalaallit arlallit Nykøbing Falster Håndboldimut nuulerput
Arnat assammik arsartartut Nunatsinneersut arfineq pingasut qallunaat assammik arsartartuini misiliissamaalerput.
Isumaqatigiissut assammik arsartartut kattuffiata TAAK-p aamma Nykøbing Falster Håndboldip suleqatigiissutigaat. Pisorlu aallartippoq apriilip qeqqani KNR-imi tusarliunneqarmat Nykøbing Falster Håndbold U-19 ligami unammisartussanik Nunatsinneersunik pissarserusuttoq arsartunik arlalinnik annaasaqartussanngorami.
- Oqartariaqarpugut arsartut arfineq pingasut neriuutigisamit amerlanerummata. Aamma qujamasuutigaarput Nykøbing Falster Håndbold ilinniartoqarfillu CELF inissatigut ikiuummata, aamma assammik arsartartoq Lykke Frank Hansen inuusuttunut nuuttussanut ikorfartortitut isumaqatigiissuteqarfigimmassuk, TAAK-mi siulittaasoq Jørgen Isak Olsen KNR-mut oqarpoq.
AAMMA ATUARUK Nykøbing Falster Håndbold kalaallinik amerlanerusunik piumavoq
Nuuttussanit arfineq pingasuusunit arfinillit U-19-ni unammisartuusinnaapput angajulliunerulaartut inersimasuni 2. divisionimi sungiusartalissasut. Arnat assammik arsartartut arlallit aappatik nooqatigissavaat taakkunanngalu pingasut isikkamik arsaattartuupput ataaseq assammik arsartartuusoq.
Tamarmik iluaqutissaat
- Manna tamanut iluaqutaasussaavoq. Nykøbing Falster Håndbold U-19 ligami ingerlaqqissinnaanngorpoq kalaallillu assammik arsartartut ineriartornissamut periarfissaqarlutik. Piffissami aggersumi arsartut inerikkiartussapput arlallillu ukiualuit qaangiuppata ligami unammisartunngorsinnaasutut piukkunnaateqarput, Jakob Larsen Nykøbing Falster Håndboldimi sungiusaasoq oqarpoq.
Kalaallit arnat nuna tamakkerlugu sungiusaasuat Johannes Groth Nykøbing Falster Håndboldimut attaveqartuusarpoq. Taassuma aamma pissanngatigaa Nunatsinneersut alloriaqqittussanngornerat.
- Assammik arsartartut Nykøbing Falsterimut nuuttussanngortut tamarmik nunanut allanut toqqagaangallartuniipput. Unammisartutut inerinnissamut periarfissaqarluassapput aamma iligiit inissatigut unammiffiusut peqataaffigilertussaallugit, Johannes Groth oqarpoq.
AAMMA ATUARUK Kalaallit arlariit Nykøbing Falster Håndboldimi misiliilerput
Arsartulli tamarmik iligiinnut ataatsinut inissinneqarnavianngillat.
- Nykøbing Falster Håndboldimi iligiit arlariit sungiusartarput. Nuuttussat ilaat U-19-ni ligamiittunut ilanngutissapput, ilaat inersimasuni 2. divisionimi aallartikkumaartut. Oqareernittut ilaat ukiut arlallit qaangiuppata ligami unammisartunngornissamut piukkunnaateqarput. Taakku ligami unammisartutsinni misiliillutik sungiusaqataanissamut periarfissinneqassajunnarsipput, Jakob Larsen oqarpoq.
