Kalaallit arfineq-pingasuugaangata ataaseq aningaasanoorajuttuusarpoq
Nunatsinni aningaasanoornermik uerisarneq pillugu misissuinermi, aviisimi Fyens Stiftstidendemi ullumi allaaserineqartumi oqaatigineqarpoq, aningaasanoornermik ajornartorsiutinik eqqugaasut tassaasut kalaallit angutitaasa 16 procentii arnallu 10 procentii.
Nalunaarusiami inerniliullugu oqaatigineqartut ilaat tassaavoq, aningaasanoornermik uerineq atornerluinermik ajornartorsiutinut arlalinnut maani atugaasunut attuumassuteqartoq. Misissuisunit oqaatigineqarpoq, inuiaqatigiinnit piniarnermik inuussutissarsiuteqartunit inuiaqatigiinnut nutaaliaasunut sukkasuumik ikaarsaarsimanitsinnut tunngassuteqartoq. Tamatuma kinguneranik inooqatigiinnermi ajornartorsiutinik taaneqartartut, soorlu nakuusertarneq, imminut toquttarneq, imigassamik ikiaroornartumillu ajornartorsiuteqarneq atugaanerulersarput. Inuunermilu atukkat tamakku kalaallit atugaat nunap inoqqaavisa allat aamma atugarigaat nalunaarusiami oqaatigineqarpoq.
Ilisimatuutut misissuisut paasissutissat aningaasanoornermut uerisarnitsinnut tunngasut illoqarfinni qulingiluani nunaqarfinnilu 13-ini nunatta annersaaneersunit pissarsiarisimavaat, ilaatigut nakorsat misissuineri, apersuinerpassuit apeqqutillu immersugassat tunngavigineqarsimallutik.
