Kalaallit aningaasassaat ukioq manna aalajangiivineqassanngilaq

Kalaallit aningaasassaat pillugit inatsisissatut siunnersuutigineqartoq Folketingimi ukioq manna aalajangiivigineqassanngilaq. Folketingimi kalaallinut tunngassuteqartunut ataatsimiititaliaq ullumi ataatsimiikkami taama inerniliivoq. Siunnersuut tallimanngorpat pingajussaaneerlugu Folketingimi oqalusserineqartussaagaluarpoq, ataatsimiititaliamili illaasortat arlalinnik apeqqutissaqaalummata siunnersuutip oqaluuserineqarnissaa aappaagumut kinguartinneqarpoq.

Kalaallit Folketingimi ilaasortat kalaallit aningaasassaat pillugit suliassami najuutinnginnerat malunnaqaaq. Kuupik Kleist Lars-Emil Johanseniluunniit Folketingip apeqqut pillugu aappassaaneerinninnerani najuutinngillat aammalu ullumi Kalaallit Nunaannut tunngassuteqartunut Ataatsimiititaliap ataatsimiinnerani najuunnatik.

Tamanna uggornarpoq tassami Kalaallit Nunaata aningaasanik immikkut ittunik kissaateqarnera paasissallugu pisariaqartinneqarmat. Taamatut oqarpoq Søren Espersen Dansk Folkeparti-meersoq.

- Kuupik Kleist aamma Lars-Emil Johansen suliassamik oqaluuserinninnitsinni najuuttariaqaraluarput. Qularutiginngilara aamma kalaallit aningaasaqalernissartik kissaatigissagaat. Tamanna Danmarkip aammaarluni Kalaallit Nunaannik pinngitsaaliiniarneranik oqallitsitsilissanngilaq, Søren Espersen ullumi taama oqarpoq.